Ж.Мөнхбатын УИХ-ын гишүүнээс чөлөөлөгдөх хүсэлтийг дэмжив

Төрийн байгуулалтын байнгын хороо хуралдлаа. Хуралдаанаар Ж.Мөнхбатын УИХ-ын гишүүнээсээ  чөлөөлөгдөх хүсэлтийг хэлэлцэн шийдвэрлэсэн. .Тэрбээр УИХ-ын дарга Г.Занданшатар УИХ-ын гишүүнээсээ чөлөөлөгдөх хүсэлтийг өнгөрсөн сард хүргүүлсэн билээ. Хуралдаан даргалагч Н.Энхболд түүний өргөдлийг  уншиж танилцууллаа. Түүний өргөдөлд УИХ-ын тухай хуулийн холбогдох заалтыг үндэслэн, хүндэтгэх шалтгааны улмаас УИХ-ын гишүүний бүрэн эрхээсээ татгалзаж, бүрмөсөн чөлөөлөгдөх хүсэлт гаргаж байгаагаа дурджээ. Настай ээж нь эрүүл мэндийн шалтгааны улмаас гадаадад эмчлүүлэх шаардлагатай болсон болон сүүлийн жилүүдэд түүнийг концесс, нүүрс, казинотой холбож үнэтэй цаг, машинтай гэх мэтчилэн олон асуудалд хилсээр нэр холбож хэвлэл мэдээллийн хэрэгсэл болон олон нийтийн сүлжээгээр зохион байгуулалттай гүтгэн харлуулах ажлыг санаатайгаар явуулж байгаатай талаар чөлөөлөгдөх өргөдөлдөө дурдаад "Эдгээр асуудалтай холбоотойгоор хууль хяналтын байгууллагаас намайг шалгах шаардлагатай бол би УИХ-ын гишүүний халдашгүй дархан байдлын ард нуугдалгүйгээр энгийн иргэн болоод шалгуулахад бэлэн гэдгээ энэхүү үйлдлээрээ илэрхийлж байгаа болно" гэдгээ илэрхийлжээ. 

Ж.Мөнхбатын УИХ-ын гишүүнээс чөлөөлөгдөх тухай хүсэлтийг хүлээн зөвшөөрөх нь зүйтэй гэсэн томъёоллоор санал хураалт явуулахад байнгын хорооны хуралдаанд оролцсон гишүүдийн олонх саналаар дэмжигдлээ. Байнгын хорооны дүгнэлтийг УИХ-аар хэлэлцэн шийдвэрлэх юм. 

Н.Нягт