Г.Хэрлэнчулуун: Улсын хөгжлийг хүний хөгжлөөр хэмждэг

Хэнтий аймгийн ИТХ-ын дарга Г.Хэрлэнчулуунтай ярилцлаа.

 -Та 21 аймагт  ИТХ-ын даргаар ажиллаж байгаа хоёр эмэгтэйн нэг. Аймгийн иргэдийн хурал бол мини парламент. Эмэгтэй хүн шийдвэр гаргах түвшинд удирдахад ямар онцлог, давуу тал ажиглагдав?

-Хэнтий аймаг шийдвэр гаргах түвшинд эмэгтэйчүүдийг дэмжих тал дээр тодорхой ахиц гарч байгаа. Аймгийн ИТХ-ын тухайд 39 төлөөлөгчөөс зургаа нь эмэгтэй. Сумын Иргэдийн хуралд буюу анхан шатанд 400 гаруй төлөөлөгчөөс 100 гаруй нь эмэгтэй. Үндсэндээ 40 хувь нь эмэгтэй төлөөлөгчтэй. Эмэгтэйчүүдийг анхан шатанд дэмжиж байна. Манай аймгийн төв Чингис хотын Засаг дарга эмэгтэй, дөрвөн сумын Иргэдийн хурал нь эмэгтэй даргатай. Мөн хоёр сум эмэгтэй Засаг даргатай. Мөн аймгийн Засаг даргын дэргэдэх газар, хэлтсийн 10 гаруй эмэгтэй дарга бий. Эмэгтэйчүүд бид бие биенээ дэмжиж ажиллаж байна.

Жендэрийн тэгш байдал бол бүх талын тэгш байдлыг хангах асуудал юм. УИХ, Засгийн газрын шийдвэрээр аймаг орон нутгийн хөгжил, хөрөнгө оруулалт бүтээн байгуулалт үргэлжилнэ. Хамгийн гол нь бид хөгжлийг хүний хөгжлөөр хэмжинэ. Эмэгтэйчүүд шийдвэр гаргах түвшинд олон байснаар хүүхэд, гэр бүл, эрүүл мэнд, боловсрол гээд нийгмийн асуудлыг түлхүү олж хардаг. Бүтээн байгуулалт нь хүний хөгжилтэй хавсарч байж улс орны хөгжил дэвшил үргэлжилнэ.

-Эмэгтэйчүүдийн манлайллыг нэмэгдүүлэхэд юу тулгамдаж байна вэ?

-Эмэгтэйчүүдэд санхүүгийн асуудал тулгардаг. Учир нь эмэгтэйчүүд гэр орон, үр хүүхдээ анхаардаг. Мөн гэр бүл, хамт олны дэмжлэг чухал. Нийгмийн сэтгэл зүй, хэвшмэл ойлголтуудыг арилгахад анхаарч ажиллах хэрэгтэй. Эмэгтэйчүүд маань олон салбарт манлайллыг бий болгож чадаж байна. Гэхдээ энэ нь тэр бүр олон нийтийн анхааралд очихгүй байна. Тиймээс нийгэмд өөрсдийгөө ойлгуулахад зүтгэл гаргах шаардлагатай.

-Шийдвэр гаргах түвшинд эмэгтэйчүүд хүлээн зөвшөөрөгдөхөд өөрсдөөс нь хамаарах зүйл байдаг уу?

-Өчигдөргүй өнөөдөр, өнөөдөргүй маргааш байдаггүй. Өнөөдөр харилцаа, хандлагаасаа эхлээд бусдад хүлээн зөвшөөрөгдөх эсэх шалтгаална. Тиймээс өнөөдрийн үйл ажиллагаанаас дараагийн үедээ ямар орон зай, зам мөр үлдээх нь хамаарна. Шийдвэр гаргах түвшинд ажиллаж байгаа эмэгтэйчүүд бүхий л талаараа “Бид дараа үеэ бий болгоно” гэдэг зарчмыг барьж ажиллах ёстой.