Орон нутагт багш хомстолтой байна

УИХ-ын чуулганы нэгдсэн хуралдаан болж байна. Хуралдаанаар Боловсролын багц  хуулийн төслийн анхны хэлэлцүүлгийг хийж байгаа юм. 

Хуулийн төсөлд англи хэлийг үндсэн гадаад хэл байхаар заахаар тусгасан.  Боловсрол, шинжлэх ухааны сайд Л.Энх-Амгалан энэ талаар “Англи хэлийг гуравдугаар ангиас эхлэн заахаар төлөвлөөд байна. Гэхдээ бидэнд бэлтгэл хэрэгтэй. Хөтөлбөрөө бэлдэнэ, сурах бичгээ бэлдэнэ, багшаа бэлдэнэ" гэдэг байр сууриа илэрхийлсэн. 

Мөн өнгөрсөн хугацаанд боловсролын салбарт олгож буй хувьсах зардлыг суралцаж байгаа хүүхдийнх нь тоонд түшиглэн хуваарилж ирсэн. Харин дээрх төсөлд алслагдсан бүс нутагт суралцаж байгаа хүүхдэд ногдох хувьсах зардал, төвийн бүсийн сургуульд суралцаж байгаа хүүхдийн хувьсах зардал хоёр ялгаатай. Тодруулбал, алслагдсан бүс нутагт суралцаж байгаа суралцагчдад олгох хувьсах зардал илүү өндөр байхаар тогтоосон аж.

Боловсролын чанарыг сайжруулах хамгийн зөв арга бол сайн багш бэлтгэх. Тиймээс магадлан итгэмжлэгдсэн сургуульд багш бэлтгэх эрхийг өгөх. Ерөнхий боловсролын сургуулийн хамгийн сайн төгсөгч багш болохын тулд эдийн засгийн баталгаа өгөх ёстой гэж үзсэн аж. Иймээс цалинг нь нэмэгдүүлэх, нийгмийн баталгааг нь хангах заалтууд тусгасан. 

Мөн алслагдсан аймаг, сумдад багшилж байгаа сургууль, цэцэрлэгийн багш, сурган хүмүүжүүлэгч нарт эхний таван жилд зургаан сарын цалинтай тэнцэх тэтгэмж олгоно. Боловсролын салбарт 15-аас дээш жил тасралтгүй ажиллаж байгаа багш, ажиллах хүчний нэг хүүхдийг төрийн өмчийн их, дээд сургуульд үнэ төлбөргүй сургана. Одоогийн байдлаар 27 мянган хүн 15-аад дээш жил ажиллаж байна.

Хөдөө орон нутагт багш дутагдалтай байгаа. Тиймээс багш нарын нийгмин асуудалд анхаарах талаар гишүүд санал хэлж байгаа юм. 

Хэлэлцэж байгаа асуудалтай холбогдуулан гишүүд асуулт тавьж, хариулт авч байна.

Н.Энх