Би-д байхгүй бид

“Монголын үнэн” сонин энэ дугаараасаа эхлэн уншигч та бүхэндээ “Гоё хос”-уудын тухай нийтлэл, сурвалжлагуудыг хүргэх болно. Энэ удаа загвар өмсөгч Э.Энхболдын гэр бүлийг онцолж байна.

“Монгол модель” агентлагийн захирал, топ модель Д.Болормаа загварын ертөнцөд олон чадвар­лаг шавийг бэлтгэсэн. Түүний шавь нарын нэг Азийн топ мо­дель, загвар өмсөгч Э.Энхболд юм. Тус агентлагт анхлан загвар өмсөхөөсөө л томоохон брэндүү­дийн нүүр царайгаар ажиллаж, олонд танигдсан. Дэлхийн зах зээлд борлуулалт өндөртэй “Говь” брэнд  бидний  бахархал бол түү­нийг амилуулагч үе үеийн мо­де­­лиу­дын нэг нь Э.Энхболд.

Ма­­гад­­гүй эрэгтэй загвар өм­сөгч­­дөөс нийгэмд хамгийн эе­­рэг нөлөөтэй, тал бүрийн авь­­яас­тай нь байх. Загвар өм­сөгч­­дийн анхны эрэгтэй хамт­ла­гийн ахлагч, “Гэрэлт гу­дамж” төс­лийн гүйцэтгэгч, “Яг түүн шиг” шоуны оролцогч, хү­мүүн­лэгийн төслүүдийг санаач­лагч, авьяаслаг маркетер билээ. 20 настайдаа гэргий, дизайнер Д.От­гонжаргалтай танилцахдаа сандарсандаа “23-тай” гэж ганц удаа худлаа хэлсэн ч үүнээс хойш хосын харилцаанд бүх зүйл үнэнээр үргэлжилсэн гэдэг. Д.Отгонжаргал  Урлах эрдэм дээд сургуулийг төгсөөд, сургуульдаа есөн жил багшилсан. “Michel Amazonka”, “Esui boutique” брэнд үүсгэн байгуулагчдад хичээл ордог байж. 2014 онд “O Couture” хувцас загварын урланг үүсгэн байгуулмагцаа жилийн дараа “Asian model festival”-аас Азийн топ дизайнер шагнал хүр­тэж байв. Түүний дараагийн ам­жилтуудыг дурьдахаас өмнө эл хос гэрлэсэн цагаасаа хамтын хүч хөдөлмөрөөр, би-д байхгүйг бид болгон нэгтгэж, ололт ам­жил­тыг оргилуулж ирснийг дурь­дах нь зөв байх. “Хань” гэдэг үгийн утга үүнд орших болов уу. Д.Отгонжаргалын загварыг кино бүтээгч, миссийн тэмцээн зохион байгуулагч, оролцогчид, ажил хэрэгч хүмүүс, эсвэл бүр чөлөөт сэтгэгчид гээд сонирхохгүй хүн­гүй. Угаас тэр хэлбэр дүрсэнд баригдах дургүй нэгэн. Мисс, жүжигчин А.Баярцэцэг “Эх дэл­хийн мисс” тэмцээнд түүний “Шилдэг коктейль” төрлийн бү­тээ­лийг толилуулсан юм. От­гоог зорин ирсэн хүн бүр түү­ний хувьд үнэ цэнтэй. Харин түүний үнэ цэнийг Хонконгийн тэрбумтан бүсгүй цор ганц даа­шинз урлуулан тодотгосон то­хиолдол бий. Харагдах байдал, авцалдах өнгө, үзэл санаа, зо­рилгоороо яв цав тохирсон эл хосын нэг нь чимээгүй урлаж, анирлан, өдөр шөнийг ялгахгүй жарган суухад, нөгөөх нь зар сурталчилгаа, хамтрагч, зах зээл тэлэлт, төлөвлөлтөө хийх зэр­гээр давшилсаар БНХАУ-ын Өвөрмонголын Өөртөө за­сах орны нийслэл Хөх хотод “Цаби” нэртэй брэндийн салбар дэлгүүр нээлээ. Тун амжилттай эхэлсэн уг төсөл цар тахлын үед хэсэг саатсан ч, тэдний хүсэл мөрөөдлийг хэрхэн мөхөөх вэ дээ. “O couture” жилдээ 2500-3000 ширхэг нэрийн бүтээгдэхүүн үйлдвэрлэдэг. Жилийн дөрвөн улиралд эрэлт хэрэгцээтэй От­гоо дизайнер даашинз, үндэсний, чөлөөт хувцас алийг нь ч урласан гараар шигтгэсэн ямар нэгэн чимэглэл үгүй бол санаа нь амар­­даггүй онцлогтой. Хийц, ханд­­лага аль ч талаасаа энэ нь түүний ялгарал, бүтээлдээ яр­гаж уусдагийн илэрхийлэл гэлтэй.  “O Couture High fashion” шоунд цуутай моделиуд ядах юмгүй оролцож, бийлэгжүү бү­хэн уралдан ирж үздэг учир хосын хамтын бүтээлийн цогц нь гэж болно. Энэ шоуны нэр хүнд жилээс жилд өсөж байна. Ийнхүү ханьссан учраас тэдний амьдралд ан цав бага үүссэн. Зав багатай ч, заяа төөргөөр учирсан хос харц, хоолойн өнгө, биеийн хэлэмж бүгдээр ойлголцож иржээ. Ханилж, өрх тусгаарласан үеэсээ Э.Энхболд буюу Индигогийн хувьд гэрийн тавилгаа өөрөө хийх зэргээр юуханд ч гэрийн эзний зангаргаар хандаж ирсэн. 2022 онд бидний нэрлэж заншсан Индиго гэр бүлдээ мөрөөдлийн хаус барьсан явдал олон залуу гэр бүлд өөдрөг үзлийг далласан гэлтэй. Санаж явбал бүтнэ. Сар­вайж явбал атгана. Гэрийн эзэн бүгдийг улаан гараараа хүрз ат­ган эхэлж, телевизүүдийн хам­гийн сонирхолтой контент болгож чадсан юм.    

Н.Энхцэцэг

Эх сурвалж: Монголын үнэн сонин №033/24564/