Нийслэл Улаанбаатар хотноо “Нээлттэй Хөвсгөл 2023” өдөрлөг хоёр дахь өдрөө үргэлжилж байна. Их жанжин Сүхбаатарын талбайд Хөвсгөл аймгийн нээлттэй өдөрлөгийн хүрээнд 24 сум өөрийн бүтээгдэхүүнээ сурталчлан таниулж байна.
Улаанбаатарчууд амралтын энэ өдөр Сүхбаатарын талбайг зорин ирж уран зураг, урц, өвөрмөц хийцийн үндэстнүүдийн дээл, гар урлал, эмээл, сувинер зэрэг үндэсний өв соёлоо сонирхож, худалдан авч байна. "Хөвсгөлийн цагаан загас хаана байна, Хөвсгөлийн чацаргана авна, Хөвсгөл далай, Сүхбаатар усан онгоцтой сувинер зарж байна уу, Хөвсгөл далай, хорьдол сарьдагтай уран зураг сонирхъя, сумынхаа асраар орж худалдан авалт хийе" хэмээн олны яриа өрнөнө. Мөн цагаан идээ, хүнс зэрэг брэнд бүтээгдэхүүнийг сонирхож, худалдаж авч, мастер тогоочийн гарын хоолыг сайшаан амталж байна.
Үүнтэй зэрэгцээд Улаанбаатар зочид буудал “Хөвсгөлийн ирээдүй” уулзалт, хэлэлцүүлэг ид өрнөж байгаа юм. Засгийн газраас хэрэгжүүлж байгаа Шинэ сэргэлтийн бодлого дахь Хөдөөгийн сэргэлтийн хүрээнд “Нээлттэй Хөвсгөл 2023” өдөрлөгөөр Хөвсгөл нутагт ажиллаж амьдрах бүх талын дэмжлэг, боломжийг танилцуулах, аймгийн аялал жуулчлалыг хөгжүүлэх, бизнес эрхлэгчид, малчид тариаланчдын үйлдвэрлэсэн бүтээгдэхүүн үйлчилгээг орон даяар таниулан сурталчлах, борлуулах, бизнесийн түншлэлийг тогтоох, шинэ инновац туршлага судлах, дэвшилтэт технологи, тоног төхөөрөмж нэвтрүүлэх, төр хувийн хэвшлийн түншлэл, бизнес эрхлэгчдийн хамтын ажиллагааг өргөжүүлэн хөгжүүлэхэд чиглэж байна.
“Нээлттэй Хөвсгөл 2023” арга хэмжээг Хөвсгөл аймгийн Засаг даргын тамгын газар, Хөвсгөл аймгийн нутгийн зөвлөл хамтран зохион байгуулж байна. Тус өдөрлөг өнөөдөр хаалтаа хийнэ.
Н.Энх
°C
Сэтгэгдэл (0)
Сэтгэгдэл бичигдээгүй байна