“Хөвсгөлийн ирээдүй” хөрөнгө оруулалтын сангийн нээлт болж, санамж бичиг байгуулав

“Нээлттэй Хөвсгөл-2023” өдөрлөг Улаанбаатар хотноо хоёр дахь өдрөө үргэлжилж байна. Энэхүү арга хэмжээг Хөвсгөл аймгийн Засаг даргын Тамгын газар, Хөвсгөл аймгийн Нутгийн зөвлөл хамтран зохион байгуулж байгаа билээ.

Өдөрлөгийн хүрээнд “Хөвсгөлийн ирээдүй” уулзалт хэлэлцүүлэг “Улаанбаатар” зочид буудлын их танхимд болж байна. Хөвсгөл аймгийн Засаг дарга П.Лхагважав Хөвсгөл аймгийн хөгжлийн өнөөгийн байдал, цаашдын хөгжлийн боломж сэдэвт илтгэл тавив.

Уулзалт хэлэлцүүлгийн үеэр “Хөвсгөлийн ирээдүй” хөрөнгө оруулалтын сангийн нээлт болж, санамж бичиг байгуулав.

 Санамж бичигт Хөвсгөл аймгийн Засаг дарга П.Лхагважав, Хөвсгөл аймгийн Нутгийн зөвлөлийн дарга Ц.Цэцэнзориг, Хөвсгөл аймгийн Засаг даргын орлогч М.Хуягбаатар, “Ашид Ассет менежмент” ХХК-ийн захирал Ц.Нацагдорж  нар гарын үсэв зурлаа.  

“Хөвсгөлийн ирээдүй” хөрөнгө оруулалтын сан байгуулснаар Хөвсгөл аймагт хөдөө аж ахуйн гаралтай бүтээгдэхүүний судалгаа хөгжүүлэлт хийж, инновацын гаралтай бүтээгдэхүүнийг нутгийн иргэд, бизнес эрхлэгч, аж ахуйн нэгжүүдтэй хамтран нутагшуулж, бие даан хөгжих боломжийг бүрдүүлэх аж. Ингэснээр органик үйлдвэрлэлээс олсон орлогоо хөрөнгө оруулалтын сандаа төвлөрүүлж, өгөөж хүртэх, томоохон аялал жуулчлал болон органик үйлдвэрлэгч компанийн хувьцаа эзэмшигч болох нөхцөлийг нутгийн ард иргэдэд олгож байгаагаараа  ач холбогдолтой юм.

Н.Нягт