“Нээлттэй Хөвсгөл-2023” өдөрлөгийн хаалтын ажиллагаа Сүхбаатарын талбайд боллоо. Энэхүү арга хэмжээг Хөвсгөл аймгийн Засаг даргын Тамгын газар, Хөвсгөл аймгийн Нутгийн зөвлөл хамтран зохион байгуулсан юм.
Тус өдөрлөгийн хаалтын ёслолын ажиллагаанд Хөвсгөл аймгийн Засаг даргын орлогч М.Хуягбаатар “Улсын нийслэл Улаанбаатар хотын төв талбайд аймгийн нээлттэй өдрүүддээ амжилттай хийж, өндөрлөлөө. Энэхүү арга хэмжээнд Хөвсгөл аймгаас төлөөлөн ирж оролцсон бүх сумын удирдлагууд, Хөвсгөл аймгийнхаа иргэд, аж ахуйн нэгжүүдэд талархаж байгаагаа илэрхийлье. “Нээлттэй Хөвсгөл 2023” өдөрлөгийг зохион байгуулахад идэвх санаачилгатай оролцсон Улаанбаатар хот дахь Нутгийн зөвлөл болон нийслэл хотод ажиллаж, амьдардаг уугуул, суугуул хөвсгөлчүүд, хөвсгөлийн оюутан залуус, үйл ажиллагаа явуулдаг Хөвсгөлийн компаниуддаа талархаж байгаагаа илэрхийлье. Энэ хоёр өдөр Хөвсгөл аймгаас зорин ирсэн иргэд, аж ахуйн нэгжүүдийн бараа бүтээгдэхүүний борлуулалтын орлого нэг тэрбум гаруй төгрөгөөр давлаа. Энэ нь хөдөөгийн аж ахуй нэгж, эрхлэгчдэд том хөрөнгө оруулагч болж байна гэж бид ойлгож байна. Олон сайхан хүмүүс бидэнд шинэ санаа, сургамжаа хайрлалаа. Нийслэлчүүддээ баярлалаа гэж хэлье” хэмээв.
Дараагаар нь Хөвсгөл аймгийн Нутгийн зөвлөлийн дэд дарга Д.Дамдиндорж “Мянга гаруй километрийн цаанаас Хөвсгөлчүүдээ зорин ирж, хийж бүтээснээ таниулж, сурталчилсан та бүхэндээ баярлалаа. Энэ хоёр өдөр уран зургийн музей, үзэсгэлэн худалдаа, уулзалт хэлэлцүүлгийг амжилттай зохион байгууллаа” хэмээн онцлов.
Хаалтын ажиллагааны үеэр Хөвсгөл аймгийн Улаанбаатар хот дахь Нутгийн зөвлөлөөс энэхүү арга хэмжээнд амжилттай оролцсон сум, компани, иргэнийг тус тус шалгаруулж, Өргөмжлөл олголоо.
Мөн оюутан, залуучуудын дунд зохион байгуулсан 3x3 тэмцээнд шалгарсан багт шагнал гардууллаа.
Ийнхүү “НЭЭЛТТЭЙ ХӨВСГӨЛ 2023” өдөрлөг амжилттай зохион байгуулагдан өндөрлөлөө.
Н.Энх
°C
Сэтгэгдэл (0)
Сэтгэгдэл бичигдээгүй байна