“Багануур” ХК-ийн Үйлдвэрчний хорооны зүгээс нүүрсний үнийг нэмэгдүүлэх тухай шаардлагыг Эрчим хүчний зохицуулах хороонд хүргүүлжээ. Ингэж байж уурхай хуримтлагдсан өр төлбөрөөс гарах, алдагдалгүй ажиллах боломж бүрдэнэ гэж тэд үзэж байгаа аж. Энэ талаар “Багануур” ХК-ийн Үйлдвэрчний хорооны дарга Д.Жавхлангаас тодруулахад “Бидний зүгээс энэ сарын 6-ны өдөр уурхайн 30 гаруй ажилтны хамтаар Эрчим хүчний зохицуулах хороонд очиж уулзсан. Ингэхдээ нүүрсний үнийг нэмэгдүүлэх тухай шаардлагаа хүргүүлсэн. Манай зүгээс нүүрсний үнийг нэмэгдүүлэх агуулгатай шаардлагыг хүргүүлээд байна. Нүүрсийг өөрийн өртөгт нь хүргэснээр манай компани хэвийн үйл ажиллагаа явуулах боломжтой болохоос гадна ажилчдынхаа нийгмийн асуудлыг шийдвэрлэх юм. Улмаар ажилчид өөрийн хүсэлтээр ажлаас гарч байгаа асуудлыг ч гэсэн хэвийн болгох боломж бүрдэнэ гэж бид үзэж байгаа юм. “Багануур” ХК алдагдалгүй ажилласнаар хөдөлмөрийн аюулгүй байдал талд анхаарах, ажлын байрны орчин нөхцөлийг сайжруулах боломжтой болох юм. Эрчим хүчний зохицуулах хорооны зүгээс нүүрсний үнийг нэмэгдүүлэхтэй холбоотой тооцоо судалгааг хийж байгаагаа бидэнд хэлсэн. Гэхдээ бүх зүйл Засгийн газраас хамаарна гэдгийг ч бас илэрхийлсэн. Бидний хувьд ямар ч боломжгүй зүйлийг ерөөсөө шаардаагүй. Өөр сонголт бас байж болно гэдгийг илэрхийлж байгаа юм. Тэр нь заавал нүүрсний үнийг нэмэхгүйгээр өөр хувилбар байж болно. Тодруулбал, бидэнд төрөөс ямар нэгэн байдлаар татаас олгох асуудал байгаа юм. Ер нь эрчим хүчний болон бусад салбарынхан төрөөс ямар нэгэн байдлаар татаас авдаг байтал манайд тийм зүйл байдаггүй. Татаас гэдэг нь бидний хувьд зээл хэлбэртэй байдаг. Гэтэл төрөөс ингэж ямар ч бодлогын дэмжлэг үзүүлээгүй явж ирснээс болоод манай компани өнөөдөр 230-аад тэрбум төгрөгийн өр төлбөртэйгөөр үйл ажиллагаа явуулж байна. Үүнд төрийн зохицуулалт зайлшгүй шаардлагатай. Тэр нь ямар ч хэлбэртэй байж болно шүү дээ. Техник, тоног төхөөрөмжийн хөнгөлөлт, чөлөөлөлт юм уу эсвэл ажилчдын нийгмийн болон эрүүл мэндийн даатгалын өр төлбөрөөс чөлөөлөх зэргээр зохицуулалт хийх л асуудал шүү дээ. Нүүрсний үнэ нэмэгдүүлэх, эсвэл төрөөс ямар нэгэн байдлаар менежментийн зохицуулалт хийх шаардлагатай гэдэгт манай компанийн нийт ажилчин дуу нэгтэйгээр санал нийлдэг. Тийм ч учраас бүгд гарын үсгээ зурсан. Нүүрсний үнэ нэмэгдвэл цалин хөлс нэмэгдэнэ, ажиллах орчин нөхцөл сайжирна гэдэг нь ойлгомжтой учраас бид бүх цаг үед энэ тухайд нэг сэтгэл зүрхтэй явж ирсэн. Цаашид төр засгийн зүгээс ямар нэгэн дэмжлэг үзүүлэхгүй, нөхцөл байдал дээрдэхгүй бол бид дараагийн шатанд шилжихэд бэлэн байгаа. Гэхдээ мэдээж яриа хэлэлцээрээр асуудлаа шийдэх гарцыг л эрэлхийлж байна. Мэдээж маш өндөр эрсдэлтэй учраас ажил хаялтад хүрэхийг хүсэхгүй. Түүнээс наагуур бидний асуудлыг шийдэх байх гэж найдаж байгаагаа та бүхнээр дамжуулан илэрхийлье. Монгол Улсад эрчим хүчний нүүрсээр хангадаг тавхан уурхай бий. Цаашид байдал хэвээр үргэлжилбэл бид 2024 онд үйл ажиллагагаа хэвийн явуулахад маш хүндрэлтэй нөхцөл байдал хүлээж байгаа учраас ижил төстэй бусад уурхайнхантай нэгдэн, дуу хоолойгоо илэрхийлэх зэргээр дараагийн шатанд шилжих болно. Ямар ч байгууллага ашигтай биш гэхэд балансаа барьж ажиллах ёстой шүү дээ. Гэтэл бид өнөөдөр тонн тутамд 5500-6000 төгрөгийн алдагдалтай ажиллаж байгаа нь зүйд нийцэхгүй байгаа юм.
Х.Өлзий
Эх сурвалж: Монголын үнэн сонин №043/24574/
°C
Сэтгэгдэл (4)