“Цахим хөгжлийн өдөрлөг” Говь-Алтай аймагт эхэллээ

“Цахимд хэвшье” уриан дор үндэсний хэмжээнд  өрнүүлж буй  “Цахим хөгжлийн өдөрлөг”  Говь-Алтай аймагт эхэллээ.   Орон нутаг дахь цахим шилжилтийг эрчимжүүлэх зорилготой   энэхүү  Ажлын хэсгийн ахлагчаар ЦХХХ-ны дэд сайд Ж.Эрхэмбаатар ажиллаж байгаа бөгөөд  бүсчилсэн хөгжлийн хүрээнд  тус яамнаас хэрэгжүүлж буй бодлого, зорилт, арга хэмжээг танилцуулж байгаа юм.  Энэхүү өдөрлөгийн хүрээнд аймаг орон нутаг дахь  цахим  шилжилт ямар түвшинд байгааг үнэлж дүгнэхийн зэрэгцээ зарим мэдээллийг өгч, холбогдох албаныхан зөвлөн туслах үйлчилгээ үзүүлж буйгаараа давуу талтай. Түүнчлэн төр, хувийн хэвшлийн түншлэлийн хүрээнд иргэдийн цахим ур чадварыг дээшлүүлэх сургалт зохион байгуулах, мэдээллийн технологийн программ хангамж үйлдвэрлэгчдийн бүтээгдэхүүн, үйлчилгээг сурталчлан таниулах зорилготой.  Нөгөө талаас төрийн үйлчилгээг шуурхай, хариуцлагатай, хүртээмжтэй хүргэх нөхцөлийг бүрдүүлэх, цахим үндэстэн болох арга хэмжээг эрчимжүүлэхийн зэрэгцээ иргэдийн цаг хугацаа, зардлыг хэмнэх, цахимаар үзүүлэх төрийн үйлчилгээний тоо, хүртээмж, иргэдийн цахим гарын үсгийн хэрэглээг нэмэгдүүлж, хэвшүүлэхэд уг өдөрлөгийн ач холбогдол оршиж буй.  Бүсчилсэн хөгжлийн хүрээнд  өнгөрсөн хугацаанд говийн болон хангайн бүсэд энэхүү өдөрлөгийг зохион байгуулсан бөгөөд  цаашид   зүүн, хойд, төвийн бүсэд үргэлжилнэ.  Баруун бүсийн  өдөрлөг  Говь-Алтай аймгаар  ийнхүү эхэлж байгаа бөгөөд энэ сарын 12-нд Увс аймгаар өндөрлөнө.  “Цахим хөгжлийн өдөрлөг”-т  аймгийн ЗДТГ, төрийн болон хувийн хэвшлийн байгууллагын удирдлагууд, сумдын ЗДТГ-ын дарга нар хамрагдаж байна.