“Цахимд хэвшье” өдөрлөг төр, хувийн хэвшлийн түншлэлийн тод жишээ болж байна

Цахим шилжилтийг эрчимжүүлэх үүрэг бүхий  Ажлын хэсгээс үндэсний хэмжээнд өрнүүлж буй “Цахим шилжилтийн өдөрлөг” Говь-Алтай аймагт  үргэлжилж байна. ЦХХХ-ны дэд сайд Ж.Эрхэмбаатараар ахлуулсан Ажлын хэсгийг байгуулсан бөгөөд бүсчилсэн хөгжлийн үзэл баримтлалд нийцүүлэх үүднээс бүсчилсэн хэлбэрээр зохион байгуулж байгаа  юм. Цахим шилжилтийг үндэсний хэмжээнд хэрэгжүүлэх, төрийн цахим үйлчилгээний  чанар, хүртээмжийг нэмэгдүүлэх зорилгоор төр, хувийн хэвшлийн түншлэлийн хүрээнд өргөн бүрэлдэхүүнтэй баг аймгуудад ажиллаж байна. Тодруулбал, “Цахимд хэвшье” арга хэмжээнд  “Монголын программ хангамж үйлдвэрлэгчдийн холбоо” ТББ-ын гишүүн 23 байгууллагын 30 гаруй төлөөлөл болон   ЦХХХЯ-ны харьяа, салбар байгууллагын холбогдох албаныхан оролцож байна.  Тэдний хувьд төрийн байгууллагын мэдээллийн технологийн мэргэжилтнүүдэд төрийн үүлэн тооцооллын дэд бүтэц /mCloud/, цахим орчны зохицуулалтын талаар,  төрийн албан хаагчдад зориулсан docx, erp, sudalgaa.gov.mn, ekids систем, орон нутгийн төрийн үйлчилгээнд процессын шинжилгээ хийх, дахин загварчилж төрийн үйлчилгээний нэгдсэн системд холбох төслийн танилцуулга зэргийг хийж байна. Түүнчлэн ерөнхий боловсролын сургуулийн багш, сурагч болон  МСҮТ-ийн суралцагч, оюутнуудад сургалт, мэдээлэл “Цахим орчин дахь хүүхэд хамгаалал, Хүүхэд хамгааллын тухай хууль /шинэчилсэн найруулга/-д цахим орчинд хүүхдийн эрхийг хамгаалахтай холбоотой зохицуулалтын талаарх мэдээллийг  ХХЗХ-ны мэргэжилтэн , “Мөрөөдөлдөө хүрэх алхам” сэдэвт сургалтыг “Момэйд виртуал туслахын агентлаг”-аас сургалт явуулж байна.