​ “Цахим хөгжлийн өдөрлөг” Завхан аймагт болж байна

ЦХХХЯ-наас санаачлан  үндэсний хэмжээнд  өрнүүлж буй “Цахим хөгжлийн өдөрлөг”  Завхан аймагт  эхэллээ. Цахим шилжилтийг эрчимжүүлэх, төрийн цахим үйлчилгээний чанар, хүртээмжийг нэмэгдүүлэх, иргэдийн цахим ур чадварыг дээшлүүлэх зорилготойгоор ЦХХХ-ны сайдын тушаалаар Ажлын хэсгийг  байгуулсан  бөгөөд ЦХХХ-ны дэд сайд Ж.Эрхэмбаатар ахлан ажиллаж байна. Түүний хувьд Улиастай хотод болж буй “Цахимд хэвшье” арга хэмжээний хүрээнд ЦХХХЯ-наас  хэрэгжүүлж буй бодлого, зорилт, арга хэмжээний талаарх танилцуулга, мэдээллийг өгсөн бол  Завхан аймгийн Засаг даргын Тамгын газрын  дарга Т.Рэнчинванжал  орон нутгийнхаа цахимжилтын талаарх мэдээллийг өгч, өдөрлөгийг нээсэн юм.  Энэхүү өдөрлөгийн хүрээнд  “Цахим үндэстэн” болох уриалга  орон нутагт хэрхэн хэрэгжиж байгааг газар дээр нь ажиллан, үнэлж дүгнэхийн зэрэгцээ салбарын яам, холбогдох мэргэжилтнүүдийн  зүгээс мэргэжил арга зүйн болон бодлогын дэмжлэг үзүүлэх үндсэн зорилготой. Ингэснээр  цахимд хэвшихэд тулгарч буй асуудлыг засаж залруулах, улмаар иргэдийн хэрэглээнд хэвшүүлэх, төрийн үйлчилгээг түргэн шуурхай, чирэгдэлгүй болгохыг зорьж байгааг албаныхан онцолж байгаа юм.   “Цахимд хэвшье” уриатайгаар 21 аймагт   өрнүүлж буй өдөрлөгт  Завхан аймгийн  удирдлагууд болон төрийн албан хаагчид, ЕБС-ийн багш, сурагчдад зориулсан сургалтыг зохион байгуулсан бөгөөд  хувиараа бизнес эрхлэгч иргэд, аж ахуйн нэгж, олон нийтэд зориулан “Мэдээллийн технологийн үндэсний программ хангамж үйлдвэрлэгчдийн холбоо” ТББ-ын гишүүн 20 гаруй байгууллагын төлөөллийн зүгээс өөрсдийн бүтээгдэхүүн үйлчилгээг танилцуулахаас гадна мэргэжлийн багийн зөвлөх  үйлчилгээг нэгэн зэрэг  хүргэж ажиллалаа.