УИХ-ын хаврын чуулган ирэх долоо хоногийн баасан гарагт хаалтаа хийхээр бэлтгэж байна. Учир нь Сонгуулийн хуулийн дагуу УИХ-ын 2024 оны сонгуульд нэр дэвшигчдийн батламжийг зургадугаар сарын 10-нд гардуулан өгнө. Ингэснээр сонгуулийн сурталчилгаа албан ёсоор эхлэх учраас ийнхүү хаврын чуулганы хаалтыг хийнэ. Тиймээс чуулган хаатал УИХ-ын тогтоол болон хуулийн төсөл хүлээн авахгүй гэдгийг УИХ-ын дарга Г.Занданшатар хэллээ. Тэрбээр энэ тухайд “УИХ-ын сонгууль болох гэж байгаатай холбоотойгоор хаврын чуулган ирэх долоо хоногт завсарлана. Тиймээс Засгийн газрын нэн яаралтай горимоор өргөн мэдүүлснээс бусад аливаа хууль, тогтоолын төслийг хүлээж авахгүй гэдгийг мэдэгдэж байна. Сонгуулийн жил чуулган завсарлахад долоо хоног дутуу байхад хуулийн төсөл өргөн бариад хэлэлцэн батлах боломжгүй” хэмээн тодотголоо.
Энэ удаагийн хаврын чуулганы хувьд 76 гишүүнтэй байх сүүлчийн парламентын, хаврын сүүлчийн чуулган болж буй. Үндсэн хуульд оруулсан өөрчлөлтийн дагуу манай улс Сонгуулийн тухай хуулиа шинэчлэн баталсан. Ингэснээр УИХ-ын сонгуулийг анх удаа бүсчилсэн хэлбэрээр, томсгосон тойрогт явуулахаар болсон. Түүнчлэн УИХ-д 126 хүнийг сонгох гэж буйгаараа онцлогтой.
Эх сурвалж: Монголын үнэн сонин №021/24600/
°C
Сэтгэгдэл (0)
Сэтгэгдэл бичигдээгүй байна