​ Төв цэнгэлдэх хүрээлэн орчмын 12.8 га газрыг улсын тусгай хэрэгцээнд авлаа

Засгийн газрын ээлжит хурал­даанаар дээрх асуудлыг хэлэлцэв. Тодруудбал,  Нийслэлийн Хан-Уул дүүргийн нутаг дэвсгэрт байрлах Төв цэнгэлдэх хүрээлэн, түүний орчмын 12.8 га газрыг нийтийн эдэлбэр газрын зориулалтаар улсын тусгай хэрэгцээнд авлаа. Ингэснээр ашиглалт, хамгаалалтад нь холбогдох хууль тогтоомжийн дагуу хяналт тавьж ажиллахыг Нийслэлийн Засаг дарга бөгөөд Улаанбаатар хотын захирагч Х.Нямбаатарт үүрэг болголоо. Ийнхүү улсын тусгай хэрэгцээнд авснаар цаашид тус хүрээлэнг олон улсын стандартад нийцсэн хүрээлэн болгох судалгааг  эх­лүүлэхээр төлөвлөж байгаа ажээ. Сануулахад, өнгөрсөн дөрөвдүгээр сарын 18-нд болсон НИТХ-ын ээлжит XXII хуралдаанаар  Төв цэнгэлдэх хүрээлэнг 100 хувь нийслэлийн эзэмшилд  авсан юм.  Тухайн үед Нийслэлийн Засаг дарга бөгөөд Улаанбаатар хотын захирагч Х.Нямбаатар “Цаашид нийслэлийн өмчийг хууль бусаар ашиглаж буйг зогсоож, нийслэлийн мэдэлд буцаан авна. Төв цэнгэлдэх хүрээлэнгийн орчимд нэгэнт баригдсан барилгыг шууд буулгах эрх Нийслэлийн Засаг дарга болон НИТХ-д байхгүй учраас хуулийн байгууллагаар шийдвэрлүүлнэ. Энэ онд Төв цэнгэлдэх хүрээлэнд засвар шинэчлэл, тохижилт хийж, зочдын суудлын тоог нэмэн, зүлгийг сайжруулж, индрийн хэсгийг өөрчилнө. Мөн Төв цэнгэлдэх хүрээлэнгийн гадна талбайд ус их тогтдог тул усны хаялга хийх зураг төсвийг боловсруулж, барилгын ажлыг эхлүүлсэн. Мөн Үндэсний их баяр наадмаар гарах худалдаа үйлчилгээнд стандарт тогтооно” хэмээн онцолж байлаа.

М.Өлзий

Эх сурвалж: Монголын үнэн сонин №022/24601/