К-попоос Холливуд хүрсэн зам

“Солонгос  давлагаа” буюу Халлю гэх БНСУ-ын  соёл урлагийн нөлөөлөл Ази тивээс хальж  дэлхийг хамарсан. Энэ давлагааны хүчтэй түрлэгийн нэг бол Рэйн. Рэйн гэх тайзны нэрээрээ алдаршсан Өмнөд Солонгосын супер од Жун Жин Хуныг “Дэлхийн хүн”-ээр онцолж байна. Монгол Улсын Засгийн газраас хэрэгжүүлж буй “Go Mongolia” төслийн хүрээнд Өмнөд Солонгосын К-поп оддын тоглолт болно. Улаанбаатар хотод ирэх сарын 15-нд болох тоглолтын бүрэлдэхүүнд Рэйн багтжээ. 20 гаруй жил үргэлжилсэн карьерынхаа хугацаанд долоон цомог, 20 гаруй сингл гаргаж, дэлхийг тойрон аялан тоглолт хийжээ. Өдгөө 42 настай Рэйнийг Өмнөд Солонгосын энтертайнментын хөгжилд хувь нэмэр оруулсан уран бүтээлч гэж зүй ёсоор нэрлэдэг. Царай муутай гэж гоочлуулж, энтертайнментуудын шалгалтад унаж байсан тэрбээр од болсон хойноо “People” сэтгүүлээс зарласан "Хамгийн үзэсгэлэнтэй хүмүүс" жагсаалтад багтаж, “Тайм” сэтгүүлийн нөлөө бүхий 100 хүний нэгээр олон удаа шалгарчээ. 

“Рэйн үзэгдэл”

Жун Жи Хун Сөүлийн баруун дүүрэгт ядуухан амьдралтай гэр бүлд өссөн. Цахим хуудастаа  “Хоолгүй хонож байсан ч аз жаргалтай байсан” гэх тайлбартай хааяа оруулдаг гэр бүлийн зургууд нь хэсэгтээ л Солонгосын интернэтийг шуугиулдаг.  БНСУ-ын эдийн засаг уналтад орсон хүнд үед аав нь хилийн чинадад ажиллахаар явжээ. Өвлийн хүйтэнд түрээсийн байрнаасаа хөөгдөх зовлон, аав нь хэзээ нэгэн цагт Бразилаас их мөнгөтэй ирнэ гэсэн мөрөөдөл дунд бага насаа үдсэн байна. Дуучин болох мөрөөдөлтэй хүү зургадугаар ангиасаа бүжиглэж, сурагчдын дунд чамгүй алдартай болжээ. Сөүлийн боломжийн амьдралтай айлын хүүхдүүдэд од болох хэцүү биш ч ядуу хүүд хүршгүй холын зүйл байв. Насаар ах хүүхдүүдтэй хамт сонирхогчдын бүжгийн тэмцээнд оролцож, сургуулиа хэсэг хугацаанд орхижээ. Хожим “Миний бага нас 1990-ээд оны солонгос савангийн дууриас ялгарах зүйлгүй өнгөрсөн. Ээж минь хүндээр өвдөхөд бид хоолны мөнгөгүй болсон. Хөөгдөхгүйн тулд байрны эзнээс өвдөг сөгдөн гуйдаг. Хүмүүс намайг дорд үзэж байна гэж гудамжны залуустай нийлж сургуулиа орхисон. Намайг танхайчуудаас салгасан хүн бол миний нагац эгч. Ээжийг нас барсны дараа бидний асран хамгаалагч болсон. Халамжтай, бүжиглэхийг минь дэмждэг байлаа.  Би бүжиглэж байхдаа ганцаардлыг мэдэрдэггүй.  Энэ бүхэн намайг зоригтой болгосон” гэж ярьжээ. Зовлон бэрхшээлд бууж өгөлгүй дуулах мөрөөдлөө 2002 онд биелүүлэв. "Bad Guy" анхны цомгоо гаргаж, 138 мянган хувь борлуулж тухайн үед эрчээ аваад байсан К-поп урлагт хүч түрэн орж ирэв. “KBS 2004” шагнал гардуулах ёслолын тайзнаа ээждээ зориулан дуулж, үзэгчдийг мэлмэртэл уйлуулав.  2004 онд "The Rainy Day Tour" аялан тоглолтоо “Мэдисон Сквер” цэцэрлэгт хүрээлэнд хийсэн Солонгосын анхны уран бүтээлч болсон юм.  2007 он бол хөгжмийн ертөнцөд жинхэнэ “би”-гээ олсон жил байлаа. Долоон жилийн турш  JYP энтертайнментад бэлтгэл хийж, дөрвөн цомог гаргасан Рэйний нэр хүнд хилийн чинадад цуурайтжээ. Үнэндээ JYP нэгэнт супер од болсон дуучныхаа хэмжээнд ажиллаж дийлэхгүй байв. Рэйн ч карьертаа анхаарч 2008 онд “J.Tune Entertainment”-ээ байгуулав. Шилдэг баг бүрдүүлсэн тэрбээр тухайн жилдээ тав дахь “Rainism” цомгоо гаргасан. Цомгийн эхний сингл "Love Story" тэр даруйдаа хит болсон ч БНСУ-ын Залуучуудын хорооноос шүүмжлэл дагуулжээ. “Залууст тохиромжгүй, хэт тачаангуй төрх бүрдүүлсэн” гэж зарласнаар “Rainism” асуудал үүсгэсэн. Аз болоход шүтэн бишрэгчид өөрчлөлтийг нь урам зоригтойгоор хүлээн авснаар хөгжмийн карьерынх нь оргил үе эхлэв. Цомгийн борлуулалт огцом өсөв. Дуу нь хит болохын хэрээр өмсгөл зүүсгэл хүртэл моод  болно. “Six To Five” брэндээ гаргасан нь бүтээлч зангийн бас нэг илэрхийлэл болсон. Сүүлийн жилүүдэд Рэйн зөвлөгч, продюсерын үүрэгтэйгээр К-поп оддын дараагийн шинэ үеийг төлөвшүүлэхийг зорин ажиллаж байна.

Солонгосын амьд домог

“Full House” бол бүх цаг үеийн хамгийн өндөр үнэлгээтэй Өмнөд Солонгосын олон ангит кино. Түүнийг хамтран тоглосон жүжигчин Сонг Хю Кётой хайр сэтгэлийн холбоотой болсон тухай цуурхал киног улам алдаршуулсан юм. Энэ дүрээрээ Рэйн KBS телевизийн шилдэг гол дүрийн шагнал хүртжээ. Продюссерууд алдартай болохыг хүсвэл давхраа оёулахыг зөвлөж байлаа. Гэхдээ тэр төрөлх царайгаараа Азийн эрэгтэй жүжигчдийн нийтлэг төрхийг өөрчилсөн. Товчхондоо солонгос эрэгтэй жүжигчдийг Рэйнээс өмнөх ба дараах гэж ангилахад буруудахгүй. 1990, 2000 оны эхэн үеийн алдартай жүжигчид давхраатай нүд, өндөр хамраараа кино урлагт гоо сайхны хэмжүүр тогтоож байв. Тэгвэл Рэйнээс хойш урлагийн сургуулийн залуус зовхины мэс засал хийлгэх нь эрс буурчээ. Түүний ази төрхийг Холливудын найруулагч нар анзаарав. Алдарт “Матрикс” гурамсан цувралын найруулагч эгч дүү Вачовскийн кинонд дүр бүтээж Холливудын  дэвжээнд гарсан юм.  Энэ тухайгаа “Yonhap News” сонинд ярилцлагадаа “Хэдийгээр туслах дүр бүтээсэн. Ингэхдээ жижиг дүр биш жижиг жүжигчин байдгийг ойлгосон” гэжээ. Вачовскийн итгэлийг алдалгүй найруулагч Жеймс Мактигийн “Ninja Assassin” киноны  гол дүрийг чадварлаг бүтээсэн. Хэлний бэрхшээлийг эс тооцвол Сьюзан Серендон, Жон Гудмен, Кристина Риччи , Мэтью Фокс  нартай эн зэрэгцэн тоглож чаджээ. “Disney+”-ийн шинэ цуврал  “Улаан хун”-гаар кино урлагт зодог тайлах болоогүйгээ батлан фэнүүдээ баярлууллаа. К-драм сонирхогчид түүний бүтээсэн дүрд өндөр үнэлгээ өгсөн.  Рэйн 2017 онд жүжигчин Ким Тэ Хитэй гэрлэсэн. Тэд хоёр хүүхэдтэй. Гэр бүл зохиосноос хойш хөрөнгө оруулалт, үл хөдлөхийн салбарт бизнес эрхлэх болжээ. Цэргийн алба хааж, хувийн амьдралдаа анхаарлаа хандуулахын тулд завсарлага авсан хэдий ч нэр алдар одоо ч энтертайнментын салбарт хэвээрээ байна. Өнөөдрийг хүртэл уйгагүй хөдөлмөрч байдал, ажлын хариуцлага болон ёс зүйтэй хандлагаар залуу шинэ уран бүтээлчдэдээ үлгэр жишээ болж, түүгээр зогсохгүй К-попыг дэлхий даяар түгээхэд оруулсан хувь нэмрээрээ БНСУ-ын алдартнуудын эгнээнд зүй ёсоор бичигдэх амьд домог билээ.

Рэйний тухай баримтууд:

• Жун Жи Хуны тайзны нэр Рэйн нь уйтгар гунигийг илэрхийлдэг. CNN-д өгсөн ярилцлагадаа “Анх бүжиглэж байхдаа гунигтай харагддаг байсан учраас Рэйн нэрийг сонгож, энэ төрхөө бүтээхээр шийдсэн” гэжээ.
• Карьераа туслах бүжигчнээр эхлүүлсэн. Ээжийгээ 18 настайдаа алдсаныхаа дараахан JYP энтертайнментад ирж, туслах бүжигчнээр ажиллажээ. Шаргуу хөдөлмөрлөсний эцэст “Fanclub” хөвгүүдийн хамтлагтай дуулсан. 
• “Бээжин-2008” зуны олимпын сүлд дууг дуулсан. Мөн наадмын хаалтын ёслолд оролцон  “Би Бээжинд хайртай” дууг дуулснаар олон улсад улам нэр хүндтэй болжээ.
• “It’s Raining” цомгоороо дэлхийд танил болсон. Энэ нь түүний гурав дахь цомог юм.
• Зүүн өмнөд Азид хийсэн анхны “Rainy Day Tour” аялан тоглолтоороо 35 сая ам.долларын орлого олсон.
• 2004 онд “Full House” цувралаар К-драмын ертөнцөд хүч үзэж эхэлсэн.
• “Speed Racer”, “Ninja Assassin” зэрэг Холливудын кинонд тоглосон. 2010 онд MTV Movie Awards-аас шагнал хүртсэн анхны солонгос од болов.
• Тэрбээр 2007 онд хувийн менежментийн компани байгуулж, бизнест хөл тавьсан. R.A.I.N Company агентлагаа 2020 онд байгуулжээ.
• 2008 онд  “Six to Five” хувцасны брэндээ гаргасан.
• 2011 онд цэргийн жинхэнэ албанд татагдаж, 2013 онд халагдсан.
• Солонгосын гоо сайхны бэлгэ тэмдэг, жүжигчин Ким Тэ Хитэй 2017 онд гэрлэсэн. Тэд таван жил үерхжээ.
• Түүний цэвэр хөрөнгө 20 сая ам.доллар. “Hyundai”, “Lotte”, “Pantech”, “LG Electronics”, “SK Telecom”, “Pepsi” компанитай хамтран ажилладаг, Өмнөд Солонгосын соёлын элч юм.
• Хүмүүнлэгийн үйлсэд идэвхтэй оролцдог. Хүүхдийн эрхийг хамгаалах өдрөөр 2022 онд Олон улсын хөгжлийн байгууллагын санд 100 сая вон хандивласан.

 Х.Эрдэнэзаяа

Эх сурвалж: Монголын үнэн сонин №032/24611/