Хүсэл мөрөөдлөө биелүүлэх зорилго дор Ч.Гантөмөр, Д.Амаржаргал нар нэгдэж, БНСУ-ыг далайн эргийн дагуу бүтэн тойрох “ONE WAY BRO’s” буюу "Нэг зорилгын төлөөх ахан дүүс" нэртэй дугуйн аяллаа эхлүүлээд буй. Тэд энэхүү аяллаа өнгөрсөн есдүгээр сарын 22-нд эхлүүлсэн бөгөөд одоогоор 1000 гаруй км замыг туулаад байна.
Тэд 26 өдрийн хугацаанд 2100 км замыг туулах бөгөөд аяллынхаа хүрээнд “Мянган зоосон гахай” сайн үйлсийг аяныг эхлүүлж, тархины дөрөвдүгээр ховдлын хортой хавдартай Г.Тэргэллхам охины эмчилгээний зардалд дэм болох зорилго дор аяллаа үргэлжлүүлж буйгаа мэдэгдлээ. Тэрбээр Солонгос улс дахь элэг нэгт монголчууддаа хандаж, худалдан авалт хийхэд ирдэг хариулт зоосон мөнгөө хандивлахыг, мөн дэлхийн өнцөг булан бүрд ажиллаж амьдарч буй монголчуудаа энэхүү “Мянган зоосон гахай” аянд нэгдэхийг уриаллаа.
Тэдний аяллын болон сайн үйлсийн хандивын аяны талаар дэлгэрэнгүй мэдээлэл авахыг хүсвэл ONE WAY BRO’s болон Ganfe Dugui фэйсбүүк болон 72207876, 1083558128 дугаарт холбогдох боломжтой.
Аяллын багийн гишүүн Ч.Гантөмөр өмнө нь Монгол орноо дугуйгаар тойрч байсан бол энэ удаад сайн үйлсийн аян эхлүүлж, БНСУ-ыг далайн эргийн дагуу тойрохоор шийджээ.
°C
Сэтгэгдэл (0)
Сэтгэгдэл бичигдээгүй байна