Японы Шинжлэх ухаан, технологийн дэвшилтэт хүрээлэнгийн (JAIST) эрдэмтэд матриц ашиглан хавдрын эсрэг бактерийг үржүүлэх шинэ арга боловсруулжээ. Хорт хавдартай тэмцэхийн тулд бактери ашиглахыг санал болгосноороо эл судалгаа шинэлэг болсон. Ингэхдээ хавдрын эсүүдэд нэвтэрч, өсөлтийг нь саатуулдаг “Proteus mirabilis” болон “Rhodopseudomonas palustris” бактериас бүрдсэн “AUN” бактерийн нэгдлийг гарган авчээ. Хавдрыг эмчлэх “AUN” бактерийг амжилттай өсгөвөрлөхийн тулд полидиметилсилоксан ба титаны давхар ислийн бичил матрицыг ашигласан. Улмаар үржлийн аюулгүй орчныг бүрдүүлж, хавдар хяналтгүй тархахаас сэргийлнэ. Матриц дээр ургуулсан “AUN” нь хорт хавдрын эсийг устгах чадвартай болохыг туршилтаар нотолжээ. Хөхний хорт хавдрын эстэй хулгана дээр туршихад “AUN” бактери эмд тэсвэртэй хавдрын эсрэг үр дүнтэй болохыг харуулсан. Мөн дархлааны эсүүдийн үйл ажиллагааг идэвхжүүлсэн байна. Амьтан дээр хийсэн нэмэлт туршилтууд сөрөг нөлөө үзүүлээгүй учир энэ төрлийн эмчилгээг хүнд ашиглах боломжтой гэж үзжээ.
Эх сурвалж: Монголын үнэн сонин №040/24619/
°C
Сэтгэгдэл (0)
Сэтгэгдэл бичигдээгүй байна