Эрхэм хүндээ барих эко бэлэг-”Хур” брэнд

“Амар байна уу” хэмээн мэнд мэдэн гар зөрүүлдэг уламжлалт Цагаан сарын баяр тохиоход сар хүрэхгүй хугацаа үлдээд буй. Монголчууд бид энэхүү уламжлалт баярыг өргөн дэлгэр тэмдэглэдэг учраас баярын гоёл, тавгийн идээ будаа, ууц өвчүү, ааруул өрөм, айраг сархад, зочдын гарын бэлэг гээд базаах зүйл их. Тэгвэл энэ бүхнийг нэг дороос буюу “Их наяд” худалдааны төвд зохион байгуулж буй “Амар байна уу” үзэсгэлэн худалдаанаас бэлдэх боломжтойг дуулгая. Нэг талаараа үндэсний үйлдвэрлэл эрхлэгчдийн орлогыг нэмэгдүүлж, дэмжих, нөгөө талаараа хүмүүсийн цаг зав, санхүүг хэмнэх, борлуулагч болон худалдан авагч хоёрыг холбох зорилго дор тус үзэсгэлэн худалдааг  нийслэлийн Жижиг, дунд үйлдвэрлэл үйлчилгээг дэмжих төвөөс жил бүр зохион байгуулдаг уламжлалтай. Энэхүү үзэсгэлэн худалдааны хойморт гурав дахь жилдээ өргөн үүдээ нээж буй, бэлэг бэлгийн дээд “Хур” брэндийг уншигч та бүхэндээ онцлон танилцуулж байна.

Үзэсгэлэн худалдаанд үүд хаалгаа нээсэн олон газраас нэгэн лангуу өнгө үзэмжээрээ хараа булааж, сониуч занг минь хөдөлгөх нь тэр. Жижиг оврын хана, тооно, авдар зэргээр чимж, тохижуулсан нь үндэсний бүтээгдэхүүн гэдгийг нь илүү тодотгож байлаа. Лангуу болон ширээн дээр эгнүүлэн өрсөн бүтээгдэхүүнүүдийг тогтож харвал идээний дээж цай байлаа. Хамгийн түрүүнд нүдэнд туссан “Өрөмтэй цай”-г онцлон асуухад “Та цай уу” хэмээн аягалан өгөх зуур “Найруулдаг цай ч олигтой байдаггүй дээ” гэх бодол зурсхийв. Өмнө нь ууж үзэж байсан цайтайгаа адилтгаж, тийм бодол тээн зогсов. Гэтэл...

“Онцгүй байх” гэж санаалан амсах төдий оочлов, аятайхан ч юм шиг.  “Аятайхан ч юм уу” гэж бодон дахин нэг оочлов, үнэхээр аятайхан амттай байлаа. Бодолтойгоо тэрсэлдэн оочилсоор цайгаа ууж дуусгахад “Ямар сайхан цай вэ, баярлалаа” гэх үг амнаас өөрийн эрхгүй унах нь тэр. Яг л ээжийн чанаж өгдөг “Өрөмтэй цай” шиг амттай бас нүнжигтэй байлаа. Бусад төрлийг нь ууж үзэх хүсэл төрж, худалдан авахаар шийдлээ. Үзэсгэлэн худалдааг сонирхон буй хүмүүс ч надтай адил бодол тээн амталж, төд удалгүй өрөмтэй, ааруултай, арвайтайгаас гэх зэргээр сонгон авч байгааг харахад миний “Аятайхан ч юм уу” гэдэг бодол, “Ямар сайхан цай вэ” гэсэн үг үнэнээс зөрөөгүйг баталж, нотолж байх шиг.

Олон төрөлтэй, өргөн сонголттой

Ингэж хүн бүрийн сэтгэлийг хөдөлгөж, итгэл дүүрэн худалдан авалт хийж буй цайнуудыг “Мөнх хурын хишиг” компанийн гүйцэтгэх захирал, “Нанс” болон “Хур” брэндийг үүсгэн байгуулагч  Д.Нансалмаа сэтгэлээ шингээн бүтээжээ.  Монгол цайны соёл, үндэсний үнэт зүйл, өв уламжлал, үүх түүхийг орчин цагийн залууст ойлгуулж таниулан улмаар хойч үедээ өвлүүлэн үлдээх том зорилго өвөртлөн долоон жилийн өмнө цайны үйлдвэр­лэлийн салбарт хөл тавьжээ. Эл хугацаанд хос брэндтэй болж, зах зээлд өөрийн гэсэн өнгө төрхөө тамгалж чадсан байна. Хамгийн анх буюу 2018 онд “Нанс” брэндээ өлгийдөн авч байсан бөгөөд энэхүү судалгаа, туршлага дээрээ үндэслэн амт чанар, сав боодлоо илүү шинэчлэн сайжруулж  “Хур” брэндээ бүтээжээ. 

“Нанс” брэндийн зорилтот бүлэг нь ахмад настнууд байсан бол өдгөө зах зээлд худалдан борлуулж буй “Хур” брэнд бүх насныханд зориулагдсан, мөн олон төрөлтэй гэдгээрээ онцлог, давуу талтай аж. Тухайлбал, өрөмтэй, арвайтай, ааруултай, шар будаатай, нохойн хошуутай, хушны самартай, чагатай, халгайтай гээд сонголт арвин. Цайнаас гадна хүний эрүүл мэндэд нэн тустай хатааж нунтагласан шар будаа, нохойн хошуу, хуурай өндөг зэрэг ч байв. Үндэсний уламжлалт Цагаан сарын баярт зориулан хоёр төрлийн бэлгийн багц гаргаж, хэрэглэгч худалдан авагч нартаа бэлэг барьж буй.

Эрүүл мэндэд тустай, эдийн засагт хэмнэлттэй

Дээр дурдсан цайнуудаас хүмүүсийн түгээмэл уудаг, бага насыг нь, ээж, эмээгийнх нь чанаж өгдөг байсан цайг санагдуулам, сэтгэл хөдөлгөж, дурсамж сэргээдэг “Өрөмтэй цай” болон “Ааруултай цай”-г онцлон танилцуулъя. Бүтээг­дэхүүний орц найрлага хамгийн чухал. Тиймээс тухайн бүтээг­дэхүүний гол орц найрлагад багтдаг үндсэн түүхий эд болох өрөм болон ааруулыг малчны хотноос буюу органикаар нь худалдан авч, уламжлалт арга техникээр үйлдвэрлэдэг байна. Жишээлбэл, “Ааруултай цай”-ны орцонд ааруул, сүү, давс, нохойн хошуу, ногоон цай, шар тос багтжээ.

Ач тусын тухайд нэрнээсээ л ойлгомжтой. Өрмийг сүүнээс гаргаж авдаг учраас дээд зэргийн амин дэмтэй тул эрт дээр үеэс монголчууд бүх цаг үед ялангуяа өглөөний цайндаа хэрэглэж байсан уламжлалтай. Харин ааруул нь кальциар баялаг тул яс, шүд бэхжүүлэхээс гадна амны хөндийд шүлтлэг орчин бүрдүүлдэг учраас бүх насныхан уухад илүү  тохиромжтой. Тухайн цайнууд нь хүний ядаргааг тайлж, дархлааг дэмжин эрч хүчийг нэмэгдүүлэхийн зэрэгцээ гэдэс дотрын үйл ажиллагааг тэнцвэржүүлэх, холестриныг бууруулж, уураг нөхөх зэрэг тус бүрдээ ач тустай гэдгийг үүсгэн байгуулагч Д.Нансалмаа өгүүлэхдээ итгэл дүүрэн, сэтгэл хангалуун харагдаж байлаа. Энэ мэтчилэн бүх цай нь химийн ямар нэгэн орц найрлагагүй, мөн транс тос ороогүй органик, эко учраас эрүүл мэндэд тустай бүх насныхан хүссэн үедээ найруулан уух бүрэн боломжтойг тодотгон онцолсон юм. Үнэ ханшийн хувьд хямд тул эдийн засагт ч хэмнэлттэй. Хэмжээ, сав боодлоос шалтгаалан харилцан адилгүй үнээр худалдан борлуулж байв. Жишээлбэл, нэг халуун сав цай болох хэмжээтэй буюу 125 граммтай нь 6000 төгрөг бол хоёр халуун сав цай болон хэмжээтэй буюу 250 граммтай нь 10000 төгрөгийн үнэтэй байлаа. Харин 30 ширхэгтэй цайнууд нь 15000 төгрөг бол төрөл бүрийн цайнууд багтсан хоёр төрлийн бэлгийн багцаа 15000, 35000 төгрөгөөр борлуулж байлаа.

Үнэ цэнтэй чамин савлагаа, тансаг бэлэг

Хүнс­ний бараа бүтээгдэхүүний орц найрлагатай дүйцэхүйц хэм­жээнд тавигдах нэг  асуудал бол сав баглаа боодол байдаг. Тэгвэл “Хур” брэн­дийн бүтээгдэ­хүүний сав боодол хүнсний сав баглаа боодлын стандартын бүх шаардлагыг бүрэн дүүрэн хангахаас гадна байгальд ээлтэй гэдгээрээ онцлогтой. Мөн бүх цаг үед бэлгэнд өгөхөд тохиромжтой, ялангуяа гадаадын зочин гийчдэд өргөн барихад нүүр улайлгахгүй, чамин тансаг савлагаатай багцууд ч байлаа. Тухайлбал, өнгө үзэмж төгс, модон савлагаатай эрүүл мэндийн багцад хушны самартай, чагатай, нохойн хошуутай, харин сүүтэй цайны багцад ааруултай, өрөмтэй, арвайтай цайнуудын төрөл багтжээ.  Эдгээр багцын тухайд цайных нь савыг дахин ашиглах боломжтой. Өөрөөр хэлбэл, тухайн цайгаа хэрэглэж дууссан тохиолдолд өөрийн дуртай төрлийн цайнаасаа худалдан авч, савандаа хийж дахин ашиглах боломжийг бүрдүүлсэн нь хэрэглэгч, үйлчүүлэгчээ бодсон төгс шийдэл болжээ. Мөн байгууллага, аж ахуйн нэгжийн захиалгаар логог нь цайныхаа савлагаан дээр байршуулж, үйлдвэрлэдэг аж. 

Амьдрал болон амлалтаас “өндийсөн” бизнес

Энэ онд байгалийн жимстэй цайны төрөл үйлдвэрлэж, худалдаанд гаргахаар төлөвлөж буйгаа “Нанс” болон “Хур” брэндийг үүсгэн байгуулагч Д.Нансалмаа хуваалцлаа. Тэрбээр “Хэд хэдэн шалтгаанаар цайны үйлдвэрлэл рүү орсон.  Би бамбай булчирхайтай болж, тэр үед сайн гэсэн болгоныг хэрэглэхэд түр зууртаа л дарагдаж байсан. Харин хүрэн манжин хандалж, уугаад асуудлаа шийдэж чадсан. Тиймээс энэ сайн арга, эмчилгээг бусад хүнтэй хуваалцах зорилгоор хамгийн анх “Хүрэн манжинтай цай” үйлдвэрлэж байлаа. Бас нэг шалтгаан нь ээж маань байсан юм. Ээжийгээ хотод ирчихсэн байхад нь сайхан цай чанаж өгч, хууч хөөрч суухдаа “Охин нь танд цайны суварга босгож өгнө” гэж амлаж байсан. Энэхүү амлалтаа биелүүлэхийн төлөө бизнесээ эхлүүлж, өдгөө  байнгын хэрэглэгч, худалдан авагчидтай болсондоо баяртай байгаа. Мөн байгууллага, аж ахуйн нэгжүүдтэй тогтмол хамтын ажиллагаатай байдаг. Цаашид бүтээгдэхүүнээ гадаад зах зээлд гаргах зорилго төлөвлөгөөтэй байгаа” хэмээгээд хэрэглэгч болон хамтран ажилладаг байгууллагууддаа талархал илэрхийлэхийн сацуу Монголын ард түмэндээ “модон” могой жилдээ элгээрээ энх амгалан, төрлөөрөө түвшин сайхан байхын өлзийтэй ерөөлийг өргөн дэвшүүллээ.

Цахим хаяг:

Хур брэнд

Нэрийн дэлгүүр:

Натур худалдааны төвийн В1 давхарт.

Баянмонгол хороолол Home Plaza- 1давхарт

Холбоо барих утас:

9501-0973

Мэйл хаяг:

nansalmaa2068@gmail.com

С.Юмсүрэн

 Эх сурвалж: Монголын үнэн сонин №005/24632/