“Жаазаар ханаа гоёцгооё”

Хиймэл оюун ухаан, өндөр технологи хөгжихийн хэрээр өглөө сэрээд бодож суусан зүйлсийн зураг инстаграм, фэйсбүүк, пинтерест зэрэг цахим хуудаснаа өдөр нь гараад ирэх нь сонин. Хаврын урь орж, сэтгэл гэгэлзсэн өдрүүдэд 2025 оны онцлох өнгийг илэрхийлсэн шинэ загварын хувцас,  интерьерийн зураг бараан мэдээнд булагдсан цахим орчинд гэрэл нэмнэ. Тавилгаа шинэчилж, ханын цаасаа солилгүйгээр буюу багахан зардлаар гэрийнхээ интерьерт шигтгээ нэмэхийг хүссэн хүнд пинтерест шинэ санааны уурхай. Улаанбаатарчууд цахимаас харсан зургаа ухаалаг утсан дээрээ хадгалаад “Зуун айл”-ыг зорьдог. Яг энэ жишгээр би амралтын өдрүүдэд “Зуун айл”-ыг зүглэлээ.  Жааз гэсэн хаягтай дэлгүүр Улаанбаатарт хаа сайгүй л бий. “Гэр, ажилд ойрхон газраа очоод авч болно доо” гэж бодож байж болох л юм. Гэвч тийм биш ажээ. Ямар ч интерьерийг жаазтай зургаар амилуулж болдог учир  эрэл хайгуул хийсний эцэст “Тулга жааз”-ыг сонгосон. Шалтгаан нь 300 гаруй буюу дотоодын зах зээл дэх хамгийн өргөн сонголттой төв. Зорьсон газраа хүрвэл “Жаазаар ханаа гоёцгооё” уриатай, төсөөлснөөс арвин сонголттой  дэлгүүр байв. Дэгжин, орчин үеийн уур амьсгалтай, донжтой ертөнцийг гэртээ бий болгоход тохирсон жаазнаас гадна, толь, шилийг хүссэн загвараар гаргадаг аж.

Ямар ч хэмжээтэй, дугуй хэлбэртэй жаазыг ч үйлдвэрлэнэ

Овоорсон их тренд дундаас цаг хугацааны аясаар хуучрахгүй зүйлийг олно гэдэг адал явдалтай, бэрх, мэдрэмж шаардсан ажил байлаа. Иймд  “Тулга жааз”-ын менежер, дизайнер О.Нарангэрэлээс зөвлөгөө авсан юм. Худалдан авагчид гоёмсог бас эдэлгээ даадаг жааз сурагласаар орж ирдэг гэнэ.  Мэргэжлийн хүний хувьд бараагаа ямар ч хамаагүй байдлаар худалдахаас илүү өргөө гэрт тань өнгө нэмсэн, амьдран суугаа хүний эрүүл мэндэд хоргүй бүтээгдэхүүн санал болгохыг чухалчилна. Тавилгын чанар, эдэлгээ, хийц, материал зэрэг нь хүний эрүүл мэндэд шууд нөлөөлдөг аж. Тиймээс “Тулга жааз” элдэв үнэргүй биед харшлахгүй, гандаж элэгдэхгүй, гаднын нөхцөл байдалд тэсвэртэй, удаан хугацааны турш эдлэх боломжтой жаазыг чанартай материалуудаар урлан хүргэдэг.  Чанартай зүйл худалдаж байгаадаа бардам байх нь аргагүй. Ханаа гоёх зурагнуудынхаа гуу хүрээг солихоор ирсэн би өдрийн сургалтанд суух шиг л мэдлэг хуримтлууллаа. Сүүлийн үед тренд болж байгаа, эрэлттэй захиалгаа харуулахыг хүсэхэд О.Нарангэрэл “Гэр, албан газраа байрлуулах юмс бүр утгатай, үнэ цэнтэй байх нь чухал. Гэхдээ эрүүл мэндээ бүхний түрүүнд тавих ёстой. Бид хилд ойрхон Эрээнээс материалаа татдаггүй. Улсын үйлдвэрээс нь нийлүүлдэг.  Манай бараанууд цавуулаг үнэртдэггүй, стандарттай, чанарын тэмдэгтэй. Жижиг хүрээ байсан ч сертификаттай. Хамтран ажилладаг байгууллага, худалдан авагчдадаа баталгаат бичгээ заавал үзүүлж, танилцуулдаг. Залуу гэр бүлүүд хээ хуаран зүмбэртэй, нүсэр хийцтэй  жаазыг төдийлөн таашаадаггүй.  Хүн хамгийн нандин гэсэн зүйлээ жаазанд хийдэг.  Металл хүрээ эвдрэхгүй, унасан ч бат бөх олон жилийн хэрэглээ даана. Шилнийхээ оронд хамгийн нимгэн буюу 1.2 мм-тэй целлулоид хийдэг. Жаазны өнгө жилийн трендээс хамаарч өөрчлөгддөг болсон. Манайх жааз үйлдвэрлэхээс гадна хүрээ материалыг бөөнөөр худалдаалдаг. Жаазны шил тусдаа байдаг бөгөөд эх зургийн өнгийг өөрчлөхгүй, элдэв нөлөөгүй, нар гялбадаггүй онцлогтой. Дээр нь нарны хамгаалалттай тул зургийг удаан хугацаанд хадгалахад тохиромжтой. Нарны хамгаалалттай гэснээс орчин үеийн оффисууд цонхондоо нэмэлтээр нарны хэт ягаан туяаны хамгаалттай хуулга наалгадаг болжээ” гэсэн юм. Олон төрлөөс дугуй хэлбэртэй жааз шууд л анхаарал татлаа. Жааз дөрвөлжин гэдэг ойлголт үеэ өнгөрөөжээ. Энэ дэлгүүрийн байнгын үйлчлүүлэгчдийн жагсаалтад уран зургийн галерей, зураачид, гэрэл зургийн студиуд дээгүүр бичигдэнэ. Дугуй жааз тэдэнд дөрвөн хүрээнд баригдалгүй, шинэ уран бүтээл туурвих сэдэл төрүүлсэн гэнэ. Металл материалыг матаж дугуйруулдаг энэ төрлийн үйлчилгээгээрээ тэд Монголдоо анхдагчид юм. Мөн металл хүрээний хамгийн олон буюу найман өнгөний сонголттой.

Үндэсний компаниудын алтан түнш

Хэдхэн хором саатаад гарах зуур захиалга ар араасаа хөвөрсөөр борлуулалтын албаныхан завгүй ажиллана. Хамтран ажилладаг байгууллагын төлөөлөгч, үйлчлүүлэгчид ч татрахгүй их. “Танайх үргэлж хөл хөдөлгөөнтэй байдаг уу” гэж асуувал “Тийм ээ. Манай борлуулалтын албаныханд тухтай суух зав гардаггүй. Байнгын харилцагч 20 гаруй компанитай. Саяхан жааз авахаар ирсэн худалдан авагч гэрийнхээ шүршүүрийн хаалтаа захиалаад их л баяртай гарсан” гэв. Эднийх үнэхээр шил, толиороо тавилга үйлдвэрлэгчдийн дунд нэр хүндтэй, үндсэн ханган нийлүүлэгч. Тавилга, жааз, толины металл хүрээг 2022 онд оруулж ирснээр дотоодын  тавилга үйлдвэрлэлт сайжирсан. Шилэн хаалганд LED гэрэл байршуулах болсноор өрөөний гэрэлтүүлгээ өвөрмөцөөр шийдэх, донжтой, цэгцтэй харагдуулахаас гадна орон зайг саруулхан болгодог.  Иймд тус компанийн шилэн хаалга хамгийн эрэлттэй, захиалга ихтэй гэнэ. Шил, шилэн хийцлэлээр  тасралтгүй 24 жил  үйл ажиллагаа явуулж, дэвжин дээшилсээр он цагийг туулж байна. Бүх төрлийн өнгөтэй болон өнгөгүй 2мм-12мм зузаантай шил, толин шил болон толь худалдаалдаг аж. Мөн худалдааны төв, зочид буудлын шилэн хана, фасад, террас, шатны хаалтыг хийжээ.  Эдгээрээс  “Шангрила” худалдааны төвд хийж гүйцэтгэсэн шилэн хийцийн ажлыг дурдахад хангалттай. “Тулга шилэн хийц” компанийг 2001 онд байгуулжээ. Өдгөө 20 гаруй ажилтантай, үндэсний компаниудын алтан түнш болжээ.  Ойрын амжилтаас дурдвал 2023 онд БНХАУ-ын  “Hi-tech” брэндийн албан ёсны дистербьютерээр шалгарчээ. Энэ бол шил,  шилэн хийцлэлийн тоноглол, туслах материалын 304 ган зэвэрдэггүй тоноглолын брэнд. Бидний мэдэх шил дотроо олон төрөл байдаг. Таван төрлийн толин шил, 10 төрлийн толь,  өнгөгүй шилийг 10 төрлөөр, өнгийн шилийг 20 гаруй төрлөөр хэрэглэгчдэд нийлүүлдэг. Борлуулалтаас гадна шилэн хийцлэл,  толь суурилуулалтын ажил гүйцэтгэдэг байна.  Бизнесээ өргөжүүлж шил хатаах үйлдвэр байгуулж байна. Хатаалттай шил хамгийн эрсдэлгүй. Монголд шил хатаах үйлдвэр хуруу дарам цөөн. Шил хатаах үйлдвэрээ ашиглалтад оруулж, захиалга, хүчин чадлаа нэмэхээр төлөвлөжээ. Мөн шил матах үйлчилгээг нэвтрүүлэхээр зэхсэн байна. Ингэснээр хагас дугуйрсан хана, нуман тавиурыг шилээр  үйлдвэрлэх  юм.

Толь зөвхөн өөрийгөө харахад зориулагдаагүй

“Манай спорт төвийн толийг танайх суурилуулсан. Зорьж ирлээ.  Жаазны жижиг газар гэж буруу бодож” гэсэн худалдан авагчтай таарлаа. Би ч мөн эднийд жааз сонирхож ирсэн.  О.Нарангэрэл менежер яриагаа үргэлжлүүлэн  “Яг л тань шиг жааз авахаар ирээд толь, шил гээд гэрийнхээ интерьерийг өөрчилсөн хүн олон бий. Бид байгуулагдсан цагаасаа нөлөөгүй толийг хэлбэр, хийцийн өргөн сонголттой худалдаж байна. Толь олон хэлбэртэй бас өнгөтэй байдаг. Манай үйлдвэр толь зүсэх CNC машинтай,   хүссэн хэлбэр, дүрсээ захиалж болно.  Үйлчлүүлэгчид интерьерийнхээ зургийг барьж ирээд толио зүсүүлээд авдаг. Нэг ёсондоо энгийн зүйлд чимэг оруулдаг аксессуар юм. Манай улс шил, толь үйлдвэрлэгч орон биш. Гэхдээ толин бүтээгдэхүүн үйлдвэрлэлээ өргөжүүлэх төлөвлөгөөтэй байна. CNC машинаар толин дээр  албан газрынхаа логог гаргуулаад араас нь гэрэл асаах шинэ үйлчилгээ нэвтрүүлнэ. Харахад толь ч лого нь өөр өөр өнгөөр гэрэлтэх юм. Өөрөөр хэлбэл хавтан дээр зурдаг хээ угалз, логог толин дээр гаргана”  хэмээлээ. Үйлчлүүлэгч олонтой ч ямар ч цаг үед захиалгаа хурдан шуурхай гаргаж өгдөгт харилцагчид ам сайтай байлаа. Нэг үйлчлүүлэгч хэмжээгээ алдаатай өгснөө залруулахаар эргэн холбогдоход захиалга нь гарсныг дуулаад  “Танайх ямар хурдан юм бэ” гэсэн хөгжилтэй явдал тохиолджээ. Энэ мэт шуурхай ажлын үзүүлэлт нь тус газраар дахин дахин үйлчлүүлэх шалтгаан болдог аж.

Х.Эрдэнэзаяа

Эх сурвалж: Монголын үнэн сонин №011/24638/