“Манлайлагч 350” хөтөлбөр хэрэгжинэ

Монгол Ардын Нам, Социал Демократ Монголын эмэгтэйчүүдийн холбоо, НҮБ-ын хөгжлийн хөтөлбөр хамтран 2024 оны шат шатны ээлжит сонгуульд нэр дэвших эрмэлзэлтэй эмэгтэйчүүдээ сургаж бэлтгэх, чадавхжуулах, нийгэмд эмэгтэйчүүдийн оруулж буй хувь нэмэр, тэдний манлайлах бололцоог сурталчлах, олонд таниулах, нийгэмд эерэг нөлөөллийг бий болгох зорилгоор “Манлайлагч 350” хөтөлбөрийг хэрэгжүүлж байна. 

Хөтөлбөр 2023 оны 04 дүгээр сарын 03 – 23-ны хооронд Тусгаар тогтнолын Ордонд болох бөгөөд аймаг, нийслэл, дүүргийн 350 эмэгтэй хамрагдах юм. Монгол Ардын Нам шат шатны ээлжит сонгуулиас 1 жилийн өмнө нэр дэвших боломжтой эмэгтэйчүүдээ сургаж, бэлтгэж байгаагаараа онцлогтой. 

Хөтөлбөрт аймаг, нийслэлийн Иргэдийн Төлөөлөгчдийн Хуралд сонгогдож байсан 45, сум дүүргийн Иргэдийн Төлөөлөгчдийн Хуралд сонгогдож байсан 97, нэр дэвшиж сонгуульд өрсөлдөж байсан 23, сонгуульд нэр дэвшиж байгаагүй 121 эмэгтэй хамрагдана. Үүнээс багш 53, эмч 41, нийгмийн ажилтан 7, инженер 21, эдийн засагч 61, малчин 2, төрийн захиргаа 21, бусад мэргэжлийн 66 эмэгтэй байна.  Монгол Ардын Нам жендэрийн эрх тэгш байдлыг хангах чиглэлд 2022 онд нэлээд олон ажлуудыг хийсэн. Цаашид улс төр дэх эмэгтэйчүүдийн төлөөллийг нэмэгдүүлэх, тэдэнд ээлтэй сонгуулийн тогтолцоог бүрдүүлэх чиглэлд анхаарч ажиллана.

Эх сурвалж: Nam.mn