Л.Оюун-Эрдэнэ: Иргэн та тоон гарын үсэг авснаар авлигагүй нийгэм байгуулахад хувь нэмрээ оруулна

Бизнесийн цахим таатай, нээлттэй орчин бүрдүүлэх “E-Business” платформын нээлт боллоо. Нээлтийн ажиллагаанд Ерөнхий сайд Л.Оюун-Эрдэнэ оролцов. Тэрбээр сэтгүүлчдэд өгсөн мэдээлэлдээ:

-E-Mongolia систем  1.5 сая орчим хэрэглэгчтэй болсон байна. E-Mongolia ашигладаг нийт хэрэглэгчдэдээ баярлалаа.  Өнөөдөр энэ системд “E-Business”платформ нэмэгдэж байна. Энэ платформ нээгдсэнээр тусгай зөвшөөрлийг цахимаар авч, гадаадаас ч Монголд компани байгуулж болно.  

Засгийн газар хүнтэй шууд нүүр тулахгүйгээр технологийн дэвшил ашиглаж, хүнд сурталгүй байх бодлого барьж байна. 

Авлигагүй, шилэн Монгол болоход иргэн таны тоон гарын үсэг чухал. Өнөөдөр нийтдээ 600 гаруй мянган иргэн тоон гарын үсэг авсан байна. Тоон гарын үсэгтэй болсноор цахимаар сонгууль өгөх боломж бүрдэнэ. Тоон гарын үсгээр хөрөнгө оруулалтын гэрээ баталгаажуулж болно. Төрийн үйлчилгээг цахимаар авна. Иргэн таны авлигагүй нийгэм байгуулахад оруулах чухал хувь нэмэр бол тоон гарын үсэг авах юм хэмээв. 

Н.Энх