Япон улс Фүкүшимагийн цөмийн цахилгаан станцын усыг цэвэршүүлээд далайд урсгаж байна. Загасчид, байгаль орчны мэргэжилтнүүд болон Хятадын эсэргүүцлийг үл харгалзан нэг километрийн урттай тусгай хонгилоор усыг Номхон далай руу шахах ажлыг эхлүүлсэн. Газар хөдлөлт, цүнамид өртөн 2011 онд унтарсан реакторуудыг хөргөсөн усыг тусгай саванд хадгалсан билээ.
Tepco компанийн мэдээлснээр, 1.34 сая тонн орчим ус нөөцөлжээ. Энэхүү хуримтлуулсан ус зөвхөн эвдэрсэн реакторыг хөргөхөөс гадна гүний ус, борооны нэвчилтээс болж бохирджээ. Япон улс өдөрт дээд тал нь 500 мянган литр ус далайд урсгана гэж мэдэгдсэн бөгөөд шавхаж дуусгахад 30 орчим жил шаардлагатай. Олон улсын цөмийн энергийн агентлаг усыг гадагшлуулах нь аюулгүйг мэдэгдсэн.
Японы Засгийн газар болон “Teрco” компанийн зүгээс үйлдвэрийг татан буулгахад орон зай гаргах, санамсаргүй гоожихоос урьдчилан сэргийлэхийн тулд цэвэршүүлээд далайд урсгахаас өөр аргагүй гэж үзэж байна. Хаягдал усыг гадагшлуулах төслийг эсэргүүцдэг БНХАУ-ын Гадаад хэргийн яамнаас “Далай бол хүн төрөлхтний өмч бөгөөд Фүкүшимагийн цөмийн хаягдал усыг далайд цутгаж эхэлсэн нь олон улсын эрх ашгийг үл тоомсорлож буй хувиа хичээсэн, хариуцлагагүй үйлдэл” гэж мэдэгджээ. Улмаар Хятад улс Японы 10 мужаас хүнсний бүтээгдэхүүн импортлохыг хориглолоо. Токио хаягдал усыг цэвэршүүлээд далайд урсгах нь хор хөнөөлгүйг батлах хангалттай нотолгоо гаргаж чадаагүй байна.
Х.Эрдэнэзаяа
°C
Сэтгэгдэл (0)
Сэтгэгдэл бичигдээгүй байна