Тайландын Ерөнхий сайд асан Таксин Шинаватра 15 жил дүрвэсэний эцэст өнгөрсөн мягмар гарагт эх орондоо эргэн иржээ. Түүнийг ирсэн даруйд нь баривчилж, Дээд шүүхээс авлигын хэргээр найман жил хорих ял оноолоо. Таксиныг Бангкок хотод ирснээс хэдхэн цагийн дараа Тайландын парламент бизнесийн магнат Сретта Тависиныг Ерөнхий сайдаар батлав. Сретта бол Шинаватрагийн гэр бүлтэй холбоотой эвслийг тэргүүлдэг.
Өдгөө тус эвсэлд Таксин болон түүний дүү Йинглак нарыг Ерөнхий сайдын суудлаас буулгаж цэргийн эргэлт хийсэн намууд багтаж байна. Ажиглагчдын дүгнэснээр эвслийн Засгийн газар Таксины ялыг богиносгож, улс төрийн тохиролцоо хийжээ. Нөгөөтэйгүүр, Таксин улс төрийн тавцанд эргэн ирснээр дэмжигчдийнхээ итгэлийг оллоо.
Хятад гаралтай Шинаватрагийн баян гэр бүл 20 гаруй жилийн турш Тайландын улс төрд ноёрхжээ. Таксин 2001 оны сонгуульд үнэмлэхүй ялалт байгуулж, Ерөнхий сайд болсон. Таксин ядуусын төлөө тэмцэгч гэдгээрээ олон нийтэд танигдаж, хөдөөгийн хөгжил, эрүүл мэндийг дэмжих бодлого баримталж, олон сая иргэн, ялангуяа хүн ам ихтэй ч харьцангуй ядуу нутагт амьдардаг хүмүүсийн дэмжлэгийг хүлээсэн.
Гэвч түүний Засгийн газар улс орны дотоод хагарлыг улам хурцатгаж, хотыг хөдөөгийн хүн амтай, баячуудыг ядуустай, хойд болон зүүн хойд бүс нутгийг Бангкокийн эсрэг чиглүүлсэн юм. Арми, шүүх засаглал, хүнд суртал, Бангкокийн элит болон хааны удмынхнаас бүрдсэн консерватив тогтолцоо нь түүний засаглалыг авлигад идэгдсэн, авторитар болж, нийгмийн дэг журамд заналхийлсэн гэж үздэг. Мөн Шинаватраг шүүмжлэгчид үндэстний нэр хүндийн илэрхийлэл хаант засаглалд заналхийлсэн гэж буруутгадаг.
Х.Эрдэнэзаяа
°C
Сэтгэгдэл (0)
Сэтгэгдэл бичигдээгүй байна