Израилын цэргүүд “Хамас” бүлэглэлд цохилт өгөх зорилгоор Газа хотын хамгийн том “Аль-Шифа” эмнэлэг рүү дайралт хийж байна. Палестинчууд “Аль-Шифа”-г онилсон дайралтуудыг Израил Газын зурвас дахь энгийн иргэдийн амь насыг үл тоомсорлож буйн нотолгоо гэж мэдэгдсэн. Харин Израилын тал “Хамас” энгийн иргэдийг амьд бамбай болгон ашигласны жишээ гэжээ. Газын зурвас дахь бусад эмнэлгийг мөн адил аргаар “Хамас” ашигласныг мөн дурджээ. Яаралтай тусламжийн багаж хэрэгсэл, цахилгаангүй болсон эмнэлгийн ажилтнууд гал зогсоохыг уриалж, олон улсын байгууллагад хандлаа. Цахилгаангүй учир эрчимт эмчилгээний эмч нар дутуу төрсөн нярайг аврахын тулд тугалган цаасаар ороож буй бичлэгээ НҮБ-д илгээжээ. Газын зурваст хүмүүнлэг ёсны үүднээс цуврал байдлаар түр гал зогсоохыг уриалсан тогтоолыг НҮБ-ын Аюулгүйн зөвлөл баталжээ. 12 улс уг тогтоолыг батлахыг дэмжсэн бол АНУ, ОХУ, Их Британи гэсэн гурван улс түдгэлзсэн байна. Тогтоолд “НҮБ-ын хүмүүнлэгийн агентлагууд, тэдгээрийн түншлэгч байгууллагуудаас үзүүлж буй хүмүүнлэгийн тусламжийг бүрэн бүтэн байдлаар, богино хугацаанд, аюул саадгүйгээр хүргэх үүднээс олон улсын хүмүүнлэгийн хууль тогтоомжид нийцүүлэн Газын зурваст яаралтай гал зогсоож, хүмүүнлэгийн зурвас гаргахыг” уриалжээ.
°C
Сэтгэгдэл (0)
Сэтгэгдэл бичигдээгүй байна