Казахстан Засгийн газраа шинэчилж, Хятадын их нүүдэл эхлэв

Тойм

 Өнгөрч буй долоо хоногт олон улсад өрнөсөн гол үйл явдлуудаас товч тоймлолоо. Дорнын ард түмэн луу жилээ угтаж байна. Хятад улсад Цагаан сарын урт амралтаар хүмүүсийн их нүүдэл болдог. өнгөрсөн сарын 26-наас эхэлж, 40 хоног үргэлжлэх хугацаанд давхацсан тоогоор есөн тэрбум хүн зорчих гэнэ. Тухайлбал, 80 сая хүн агаарын тээврээр зорчих юм байна. Казахстаны Ерөнхийлөгч Касым-Жомарт Токаев Засгийн газрын танхимыг тараах тухай зарлигт гарын үсэг зурсан нь гэнэтийн явдал байлаа.Парламентын гишүүдийн олонхын саналаар Олжас Бектеновыг казахстаны Ерөнхий сайдаар томилов. Азийн халуун цэг Солонгосын хойг болсон. 2024 он гарснаас хойш хоёр Солонгосын харилцаа хүйтэрсэн. БНСУ-ын тал хэд хэдэн удаа цэргийн сургуулилалт хийж байгааг Умард Солонгосын эрх баригчид шүүмжилжээ. АНУ-д Ерөнхийлөгчийн сонгуулийн сунгаа гол мэдээ хэвээр байна. Одоогийн Ерөнхийлөгч Жо Байден Өмнөд Каролина мужид болсон Ардчилсан намын сунгаанд ялалт байгуулснаар дахин сонгогдох эхний алхмаа хийлээ. Английн хаан III Чарльз хорт хавдартай болсныг Букингемийн ордноос зарлалаа. 75 настай Чарльзыг эмч нар төрийн үүргээ хойшлуулахыг зөвлөсөн учир олон нийтийн арга хэмжээнд оролцохгүй. Өнгөрсөн долоо хоногт технологийн гигантууд завгүй байлаа. Марк Цукерберг компанийн ногдол ашгаа авсан бол Элон Маск хиймэл оюун ухааны хөгжүүлэлттэй холбоотой маргаан үүсгэсэн. Тэгвэл Цахиурын хөндийн загалмайлсан эцгүүдийн нэг Билл Гейтс “Зэсийн орд эзэмшигч дэлхийг атгана” гэсэн философио батлав. Түүний хөрөнгө оруулалттай, хиймэл оюун ашиглан ногоон шилжилтэд чухал үүрэгтэй түүхий эдийн хайгуул хийдэг “KoBold Metals” компани Замби улсад зэсийн томоохон орд илрүүлснээ мэдэгдлээ. Ордын нөөц Бүгд найрамдах ардчилсан Конго улс дахь “Ivanhoe Mines” болон БНХАУ-ын “Zijin Mining Group”-ийн хамтарсан “Kakula” уурхайн нөөцтэй дүйцэх аж. “Toyota Motor” компани АНУ-ын Кентакки муж дахь үйлдвэртээ 1.3 тэрбум ам.долларын хөрөнгө оруулалт хийхээ зарлалаа. Энэ нь тус компани ирэх оноос АНУ-ын зах зээлд бүрэн цахилгаан гурван шинэ SUV загвараа үйлдвэрлэх зорилттой нь холбоотой аж. Тэгвэл Нидерландын Засгийн газрын гишүүд мэдээллийн аюулгүй байдлын нууцлалтай холбог­дуулан фэйсбүүк сүлжээг хэрэглэхийг бүрмөсөн хориглох асуудлыг хэлэлцэж байна.

Эх сурвалж: Монголын үнэн сонин №005/24584/