БНАСАУ ажиллах хүчээ экспортолж эхэллээ

Хүний эрхийн ажиглагчдын хэлснээр, Умард Солонгосын удирдагч Ким Жон Ун цар тахлын хилийн хяналтаа сулруулж, ажиллах хүчээ гадаадад илгээж байна. АНУ-ын Төрийн департаментын хүний эрхийн асуудал хариуцсан тусгай элч Жюли Тернер Токиод айлчлах үеэрээ “Умард Солонгост хүний эрхийн байдал улам дордсон. Цар тахлаас болж Засгийн газар хяналтаа чангатгасан” гэжээ. БНАСАУ ажилчдаа ОХУ, БНХАУ руу илгээж, НҮБ-ын тогтоолыг эсэргүүцэн хатуу валютын сангаа бүрдүүлдэг. АНУ болон Европын Засгийн газрууд олон жилийн турш Умард Солонгосыг хүний эрхийг архаг, системтэйгээр зөрчиж байна гэж шүүмжилдэг.

Хүний эрхийн сүүлийн жилийн тайланд Умард Солонгосын улс төрийн хориход эрүүдэн шүүж байгааг онцолжээ. Ким Жон Уны дэглэм энэ төрлийн мэдэгдлийг тухай бүрд нь няцаан  БНАСАУ-ын эсрэг фанатизм хэмээн хариулдаг. Ким Жон Ун БНАСАУ-ын шинэ төрлийн далавчит пуужингийн туршилтаа өнгөрсөн лхагва гарагт биечлэн удирджээ.