Дорнын ард түмэн Цагаан сарын баяраа өргөн дэлгэр тэмдэглэлээ. Уламжлал, соёлын бэлгэдэл уг баярыг дэлхийн томоохон брэндүүд Азийн зах зээлд борлолтоо өсгөх маркетингаа болгожээ. Жилийн оргил үеэр Азийн хоёр тэрбум хэрэглэгчийн худалдан авалт идэвхжин зах зээлийн урсгал Дорныг чиглэдэг. Тиймээс азиуд төдийгүй олон улсын хөрөнгө оруулагчид энэ өдрийг хүлээдэг байна. Сар шинийн баяраар Хятад улсын аялал жуулчлалын орлого 30 хувиар нэмэгдэж, 52.7 тэрбум ам.долларт хүрчээ. Вьетнамын бараа бүтээгдэхүүний жижиглэнгийн худалдаа, хэрэглээний үйлчилгээний нийт орлого 21.5 тэрбум ам.доллар болж өссөн байна. Сар шинийн баярын “бялуу”-наас хүртэхийг зорьсон компаниуд зорилтот кампанит ажил өрнүүлдэг. Тухайлбал, “Apple” компани Цагаан сарын сэдэвт "Бяцхан сармис" киногоо “iPhone 15 Pro Max” дээр бүтээжээ. “Burberry” брэнд луу жилийн баярт зориулсан капсул цуглуулгаа танилцууллаа. “Кока-Кола” компани ч Алтан луугийн бэлгэдлийг харуулсан логотой ундаагаа Вьетнамд худалдаанд гаргажээ.
Азиуд алдаанд дургүй
Амбицтай брэндүүд Ази гаралтай загвар өмсөгч, оддыг нүүр царайгаа болгон хэрэглэгчдийг татдаг. Ашгийн төлөөх өрсөлдөөнд оролцсон бүхэн амжилтад хүрээгүй. Зах зээлд улайрахдаа соёлын алдаа гаргасан брэнд эсрэгээрээ нэр хүндээ алдсан гашуун түүхч бий. “Dolce & Gabbana” загварын ордон 2019 онд Хятадын загвар өмсөгчийг савхаар итали хоол идэх гэж оролдож буй сурталчилгаа цацаад ихээхэн эсэргүүцэлтэй тулгарсан. Хэрэглэгчид уг зар сурталчилгааг Дорнын соёлыг шоглосон хэмээн цахимд шүүмжилснээр маргаан хурцдав. Улмаар Шанхайд зохион байгуулахаар товлосон загварын шоугаа цуцлан, уучлалт гуйсан. Гэхдээ маркетингийн алдаа удаан хугацааны үр дагавар үлдээжээ. Одоо ч Хятадын өргөн хэрэглээний зах зээлд брэндийн нэр хүнд ганхсан хэвээр байна. Лондонгийн их сургуулийн маркетингийн багш, брэндинг судлаач Тана Ликсандру “Хэрэглэгчдийн угсаатны онцлог, хэтийн төлөвийг ойлгож, тусгаж чаддаггүй, соёлын мэдрэмжгүй брэндүүд нэр хүндээ алдана. Цагаан сарын оргил үеэр азиудын сэтгэл санаа өөдрөг, хэтэвч “онгорхой” байдаг. Энэ нь компаниудыг эрхгүй татдаг. Брэндүүд Хятадын баяр гэсэн нийтлэг буруу ойлголтоор хандаж алддаг. Гэтэл Азийн орнуудын уламжлал соёл ялгатай. Тиймээс маркетингийн агентлагууд улс орноор нь дагнасан зөвлөгөө өгдөг шинэ трэнд зах зээлд гарч ирсэн. Вьетнамын зах зээлд нэвтрэхэд тусалдаг Мельбурн хотод төвтэй “Intelligence4Start” агентлагийн үүсгэн байгуулагч Питер Хуйн "Вьетнамын хэрэглэгчид ам дамжсан ярианд амархан автдаг. Тэд онлайн худалдаа хийх, гадаадаас бүтээгдэхүүн авах сонирхолтой” гэжээ.
БНХАУ-ын Z үе маркетингийн төрхийг өөрчлөв
БНХАУ-ын хэрэглэгчид цар тахлын дараа тансаг зэрэглэлийн бараа бүтээгдэхүүн худалдан авах болсон. Энэ оны нэгдүгээр улиралд алдартай брэндүүдийн борлуулалт 23 хувиар нэмэгджээ. Цагаан сараас өмнө сурталчилгаагаа идэвхжүүлдэг зарчмаар “Gucci” брэнд Хятадын олон нийтийн мэдээллийн хэрэгслээр шинэ цуглуулгаа цацсан. Тансаг зэрэглэлийн брэндүүдийн Сар шинийн баярт зориулсан сурталчилгааны төсөв нь сая ам.долларт хүрдэг. Луу жилийн сурталчилгааг Z үеийнхэн өнгөлжээ. Шинэ үе шинэ соёлын бэлгэдэл болсон. Хятадын залуучууд үнэт зүйлсээ хадгалсан нь үндэсний соёлоо дэлхийн брэнд болгох далд санаа агуулжээ. БНХАУ хурдацтай хөгжиж, чиг хандлага нь ч өөрчлөгдсөн. Өөрчлөлтийн үед брэндүүд өрсөлдөгчдөөсөө ялгарахын тулд "дахин нэгдэх", "гэртээ харих", цаасан дэнлүү, улаан өнгө зэрэг соёлын бэлгэдэл шингээсэн сэтгэл хөдөлгөм сурталчилгаанаас татгалзжээ. Сонирхолтой, шинэлэг эсвэл бүр хачирхалтай сурталчилгаа анхааралд хүрэх болсон. Жилээс жилд туршлагажиж буй брэндүүд барууны болон дорнын зах зээлийн ялгааг арилгах соёлын нарийн ширийнийг орхигдуулалгүй судалж байна. Зорилтот зах зээлд үйл ажиллагаа явуулдаг бизнесүүд нь брэндүүдийг соёлын мэдрэмжгүй байдлаас урьдчилан сэргийлэх, Азийн нийгэмд нийцэх, тэдний зан заншлыг хүндэтгэх зорилгоор кампанит ажлаа зохицуулдаг. Хэрвээ зах зээлд шинэ тоглогч бол Сар шинийн баяраар Азийн зах зээлд орох эрсдэлтэй” гэжээ.
Х.Эрдэнэзаяа
Эх сурвалж: Монголын үнэн сонин №006/24585/
°C
Сэтгэгдэл (0)
Сэтгэгдэл бичигдээгүй байна