Дэлхийн дээвэр гэгддэг Эверестэд Шинэ Зеландын иргэн Эдмунд Хиллари, шерпа Тензинг Норгай нар 1953 оны тавдугаар сарын 29-нд гарсан. Хиллари-Тензингийн экспедицээс хойш энэ оргилд олон мянган жуулчин авирч, жил ирэх тусам хөл хөдөлгөөн ихсэж байна. 2023 оны хаврын авиралтын үеэр 667 уулчин оргилд гарч, олон мянган туслах ажилтнуудыг үндсэн отогт авчирсан. Дүрэм журмын дагуу уулчид хог, тоног төхөөрөмж, авч явсан бүх зүйлээ оргилд хаяхыг хориглодог. Гэтэл уулчид хоол, хүнсээ боосон тугалган цаас, баглааг хаяж оргилыг бохирдуулж байгаад шерпа нар сэтгэл дундуур байна. Шерпа хүмүүс Эверест бол Жомолангма буюу дэлхийн эх дагина хэмээн шүтэж, хүндэтгэдэг. Хиллари-Тензингийн экспедицийн туслах шерпа Канча “Жуулчид уулыг бохирдуулах боллоо. Зарим нь тамхи татдаг, мах идэж, хогоо ууланд хаяж, бидний ёс заншлыг огоорч байна” гэжээ. Тэрбээр Хиллари, Тензинг нартай Эверестийн сүүлчийн отогт хүргэсэн шерпа. Түүний нээсэн отгоос оргил хүртэлх замыг уулчид одоо ч ашигладаг аж.
Эх сурвалж: "Монголын үнэн" сонин №009/24588/
°C
Сэтгэгдэл (0)
Сэтгэгдэл бичигдээгүй байна