Өнөөдөр эхлэх ОХУ-ын Ерөнхийлөгчийн сонгууль олон улсын хэмжээнд хамгийн их анхаарал татаж байна. Кремлийн тэргүүн Владимир Путин энэ сонгуулиар эрх мэдлээ 2030 он хүртэл бататгах эсэх нь тодорхой болно. Тэрбээр тав дахь удаагаа төрийн эрхэнд гарахыг эрмэлзэж байгаа бөгөөд энэ удаад ялсан тохиолдолд зургаан жил засгийн эрхийг барих юм. Түүнтэй Коммунист намаас Николай Харитонов, үндсэрхэг Либерал ардчилсан намаас Леонид Слуцкий, Шинэ Ардын намаас Владислав Даванков нар өрсөлдөж байгаа юм. Санал хураалтад 18-аас дээш настай, ял шийтгэл хүлээгээгүй, шоронд хоригдоогүй ОХУ-ын иргэн бүр оролцох боломжтой. Барууныхан “Кремль 146 сая хүнтэй улсынхаа улс төрийн тогтолцоо болон сонгуулийн үйл явцад хатуу хяналт тавьдаг” гэж үздэг. ОХУ болон Украины эзлэгдсэн хэсэгт 112.3 сая сонгуулийн насны иргэн байгаа бол 1.9 сая сонгуулийн эрх бүхий иргэн гадаадад амьдарч байгааг тус улсын Сонгуулийн төв комисс мэдэгсэн. ОХУ-ын Ерөнхийлөгчийн сонгуулийн ирц 2018 онд 67.5 хувьтай байсан. Энэ үеэр саналын хайрцгийг хэт олон хуудсаар дүүргэх, албадан санал хураалт явуулах зэрэг өргөн хүрээний зөрчлүүд илэрснийг ажиглагчид болон зарим сонгогч мэдээлж байв. Харин 2021 оны сонгуулийн ирц 51.7 хувьтай байв.
Эх сурвалж: "Монголын үнэн" сонин №010/24589/
°C
Сэтгэгдэл (0)
Сэтгэгдэл бичигдээгүй байна