​ Загвар зохион бүтээч И Сан Бон мастер класс сургалт хийв

Соёлын бүтээлч үйлдвэрлэлийн тэргүүлэх чиглэлд хувцас загварын салбар багтаж, үндэсний ижилсэл, ондоошлоо шингээн, өөрсдийн нөөц бололцоонд суурилан тус салбарыг хөгжүүлэх бодлогыг баримтлан ажиллаж байна. Монгол үндэсний хувцас нь дэлхийд хосгүй, өвөрмөц төдийгүй нүүдэлчдийн ахуй амьдралд төгс зохицсоноороо онцлогтой. Энэхүү ондоошлоо орчин үеийн технологитой хослуулан байнгын хэрэглээнд оруулах зорилгоор хувцас загварын салбарыг дэмжиж буй юм. Энэ хүрээнд үндэсний хувцас, загварын долоо хоногийг зохион байгуулж, дизайнерууд, салбарын төлөөлөл, ААН-ийг хамруулсан "Хувцас загварын форум" зохион байгуулжээ. Тус форумаар хувцас загварын салбарын хөгжлийн бодлого, байгальд ээлтэй монгол хувцасны брэндийг хөгжүүлэх зэрэг асуудлаар хэлэлцсэн бөгөөд БНСУ-ын Урлагийн холбооны тэргүүн Самюэль Жон, загвар зохион бүтээгч И Сан Бон нар оролцож, туршлагаасаа хуваалцлаа. Энэ үеэр загвар зохион бүтээч И Сан Бон мастер класс сургалт хийв. БНСУ-д зохион байгуулсан "Go Mongolia" арга хэмжээний үеэр И Сан Бон болон тус улсын Урлагийн холбооны тэргүүн Самюэль Жон нартай уулзаж, хамтын ажиллагааны талаар санал солилцсоны үр дүн нь энэ юм.

И Сан Бон нь Өмнөд Солонгосын уламжлалт элементүүдийг орчин үеийн хэв маяг, өрнө дорнын гоо зүйтэй хослуулсан өвөрмөц загварууд бүтээдгээрээ алдартай. Тэрбээр Рианна, Бейонсе зэрэг дэлхийн од дуучдын хувцсыг урлаж, олон улсын тавцанд өөрийн гэсэн өнгө төрхийг бий болгожээ. Тиймээс түүний арга барилаас суралцах нь Монголын залуу загвар зохион бүтээгчдэд урам зориг, шинэ санаа өгөх төдийгүй цаашид олон улсад хүлээн зөвшөөрөгдөхөд эерэг нөлөө үзүүлнэ. Түүнчлэн энэхүү арга хэмжээ нь Монгол, Өмнөд Солонгосын соёл урлагийн солилцоо, хамтын ажиллагааг өргөжүүлэх ач холбогдолтой юм.

Эх сурвалж: Монголын үнэн сонин №017/24596/