Цахим хөгжил, харилцаа холбооны дэд сайд Б.Болор-Эрдэнэ өөрийн хүсэлтээр албан тушаалаасаа чөлөөлөгдөх өргөдлөө хүргүүлсэн талаараа цахим хуудсаараа мэдэгдсэн.
Тэрбээр цахим хуудсандаа ".NextGen Government буюу шинэ үе хуучин системтэйгээ нүүр тулж, зөрчилдөж байгаа нь үнэн. Өөрчлөлт өвдөлтгүйгээр ирдэггүй гэдгийг ч ойлгож байгаа.
Харилцаа холбоо, мэдээллийн технологийн салбарын хамт олон минь, Цахим хөгжлийн яамны хамт олон, И-Монголиагийн хамт олондоо чин сэтгэлээсээ баярлалаа. Бид хамтын зорилгодоо нэгдэж үнэхээр их хөдөлмөрлөсний үр дүнд өнөөдөр цахим шилжилт ид хийгдэж байна.
Сүүлийн хэд хоног улс төрийн зохион байгуулалттай дайралт, хуучин системийн завхрал, хуурамч мэдээлэл, ХАРЛУУЛАХ ТЕХНОЛОГИ, авилгажсан системийн цохилтыг яс махандаа шингэтэл ойлгож мэдэрлээ. Мөнгө, ашиг сонирхол, эрх мэдэл байхад хэнийг ч зохион байгуулалттайгаар яллаж болдог юм байна!
Энэ систем дотор албан тушаалдаа хорогдоод үлдвэл дасаж, бугширсан системийн нэг хэсэг болохоос өөр аргагүй. Гэхдээ энэ хуучин системийн завхрал оршсоор байгаа үед та бидний хүсээд байгаа өөрчлөлт хэзээ ч хийгдэхгүй. Ганц дайчин ганцаардахгүй биш ганцаарддаг гэдгийг мэдэрлээ.
Тиймээс би дэд сайдын албан тушаалаасаа өөрийн хүсэлтээр чөлөөлөгдөх өргөдлөө хүргүүлснээ мэдэгдэж байна. Гэхдээ энэ бугширсан 30 жилийн системд бууж өгч байгаа юм биш шүү!!! Харин ч тэмцэнэ. Тэмцэхдээ илүү эрх чөлөөтэй тэмцэнэ! Илүү олон залуучуудтай хамт тэмцэнэ!
Өөрчлөлт өнөөдөр биш гэхэд маргааш заавал ирнэ. Өөрчлөлтийг өөр хандлагатай шинэ үе авчрах л болно" гээд үргэлжлүүлэн тэрбээр "Дуртай үедээ сошиал болон хэвлэлээр ямар нэгэн сэдэв олж сэвээд л огцом улс төрч, төрийн албан хаагчдаа огцруулж, иргэдийн нэр хүндэд халддаг энэ үзэгдэл нь жирийн болж байгаа нь маш харамсалтай байна.
Аливаа асуудлыг олон нийтээрээ хэлэлцэх нь бидний эрх байх, харин тэр нь дэвэрч, сенсацалж явсны бодит үр дүн байдгийг ч ухамсарлах хэрэгтэй.
Хурдтай, ажил хэрэгч, залуухан, эмэгтэй удирдагч ийм маягаар шахагдаж огцрох болсон харамсалтай байна" гэжээ.
Өнөөдрийн Засгийн газрын ээлжит хуралдаанаар түүний албан тушаалаасаа чөлөөлөгдөх асуудлыг хэлэлцэн шийдвэрлэх юм.
Н.Нягт
°C