Гурван настай хүүгийн аав: Хүүгийн бие дээрдэж, аппаратаасаа гарсан

Ээжийнхээ хамтран амьдрагчид зодуулж, ГССҮТ-ийн Эрчимт эмчилгээний тасагт эмчлүүлж буй гурван настай хүүгийн аав мэдээлэл өглөө. 

Хүүгийн аав: "Эмч нарт баярлаж байна. Амин үзүүлэлт нь сайжирсан гэж байна. Одоо аппаратнаасаа гарсан. Үргэлжлүүлэн Монголдоо эмчлүүлнэ гэвэл 70-80 хувьтай эдгэрнэ гэсэн. 

Дараагийн эмчилгээг хийлгэхээр гадаадын хэд хэдэн эмнэлэгт явуулсан. Турк улс нааштай хариу өгсөн. Эмчилгээний зардал 150 сая төгрөг гэж байна. Гадаадад эмчлүүлэхэд монголын эмч нар дагаж явна. Нислэгийн үед хүүхдийн зүрх зогсох зэрэг эрсдэл байна. 

Бид хоёр тусдаа амьдрахаар болж би ахыг нь аваад, дүү нь ээж дээр нь үлдээсэн. Харин Цагаан сарын дараагаар том хүү маань ээжийгээ, дүүгээ санаад байна гэсэн. Ингээд ээж дээр нь байлгасан. Би хоёр хүүхдээ хоёуланг нь авах бодолтой байсан. Салснаас хойш хүүхэд өвдлөө, эмчилгээний мөнгө гэх тоолонд би мөнгө явуулдаг байсан. Хүүхдүүдтэйгээ видеогоор харилцдаг байсан. 

Хүүхдийн ээж одоог хүртэл холбогдоогүй байгаа. Хуулийн байгууллага зохих хариуцлагыг хүлээлгэнэ гэж бодож байна."

Гурван настай хүүгийн аавын ах:  "Хоёр хүүхдийн ээж хүн. Миний хүү томоотой, дуу багатай. Эхнэрээ гэр бүлээс гадуур яваад байхаар уурлаад ганц удаа гар хүрсэн байдаг. Хамтарч амьдарч байгаа хүн нь зодсон байхад хоёр хоног нуусан байна. Тэгээд бөө дээр очиж үзүүлжээ. Би тэр бөөд баярлаж байна. Бөө "Хүүхдийн ийм болгосон байхад хурдан эмчид үзүүл" гээд эмнэлэгт хүргэсэн байна. Хүүхдийн буян заяа түшиж, зургаан настай ах нь тэр өдөр өөр айлд байсан байна. Хамт байсан бол бас зодуулах байжээ" гэв. 

Э.Сонор