Ж.Сүхбаатар: Надад хийсэн гэм буруутай үйлдэл байхгүй

Монгол Улсын сайд, Нийслэл Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар мэдээлэл өглөө. Тэрбээр:

-Нийслэл Улаанбаатар хотын авто замын түгжрэлийг бууруулах үндэсний хорооны даргын үүрэг ажлаас чөлөөлөгдөх хүсэлтээ УИХ дахь МАН-ын бүлэгт танилцуулсан байна. 

Автобус нийлүүлсэнтэй холбоотой асуудалд улстөрчийн хувьд эргэлзээтэй нөхцөл байдал үүсэж, шалгалтын ажиллагаа явагдаж байгаа учир ёс зүйн хариуцлага хүлээж ажлаас чөлөөлөгдөх хүсэлтээ илэрхийлсэн. Ерөнхий сайд МАН, тэр дундаа Засгийн газрын гишүүд ёсзүйн өндөрлөг дээрээ байх ёстой гэсэн зарчмыг удаа дараа хэлж байсан. Хууль тогтоогчийн хувьд, Засгийн газрын гишүүнийхээ хувьд би энэ зарчмаа баримталж ирсэн.  

Надад хийсэн гэм буруутай үйлдэл байхгүй. Гэхдээ засгийн газраас тавьсан зорилтын хүрээнд 2023 онд нийтийн тээврийн салбарт тулгамдсан асуудлыг шийдвэрлэхэд төсвийн ерөнхийлөн захирагчийн хувиар ажилласан. Энэ ажлыг хэрэгжүүлэх явцад иргэдийн дунд эргэлзээтэй нөхцөл байдал үүсгэсэн асуудал гарлаа. Автобус нийлүүлэхтэй холбоотой асуудлыг сүүлийн хоёр өдөр нэлээд ажиглалаа. Сайдын хувьд гүйцэтгэгч болон нийлүүлэгч талд шаардлагаа тавьсан хэмээв.