ФОТО: Улаанбаатар дахь "НЭЭЛТТЭЙ ХӨВСГӨЛ"

“Нээлттэй Хөвсгөл 2023” өдөрлөг  Сүхбаатарын талбайд өнөөдөр нээлтээ хийлээ. Хоёр өдөр үргэлжлэх энэ арга хэмжээг  Хөвсгөл аймгийн Засаг даргын тамгын газар, Хөвсгөл аймгийн нутгийн зөвлөл хамтран зохион байгуулжээ.

Тус өдөрлөгийг Хөвсгөл аймгийн Засаг дарга П.Ганхуяг, Хөвсгөл аймгийн Нутгийн зөвлөлийн дарга Ц.Цэцэнзориг нар нээж үг хэллээ.

Засгийн газраас хэрэгжүүлж байгаа Шинэ сэргэлтийн бодлого дахь Хөдөөгийн сэргэлтийн хүрээнд “Нээлттэй Хөвсгөл 2023” өдөрлөгөөр  Хөвсгөл нутагт ажиллаж амьдрах бүх талын дэмжлэг, боломжийг танилцуулах, аймгийн аялал жуулчлалыг хөгжүүлэх, бизнес эрхлэгчид, малчид тариаланчдын үйлдвэрлэсэн бүтээгдэхүүн үйлчилгээг орон даяар таниулан сурталчлах, борлуулах, бизнесийн түншлэлийг тогтоох, шинэ инновац туршлага судлах, дэвшилтэт технологи, тоног төхөөрөмж нэвтрүүлэх, төр хувийн хэвшлийн түншлэл, бизнес эрхлэгчдийн хамтын ажиллагааг өргөжүүлэн хөгжүүлэхэд чиглэж байна.

Тус өдөрлөгөөр

• “Хөвсгөлийн ирээдүй” нээлттэй уулзалт,
• “Нээлттэй ажлын байр”-ны үзэсгэлэн,
• “Хөвсгөлөөр аялцгаая” үзвэр, мэдээлэл,
• “Хөвсгөлчүүд дайлж байна” амталгаат худалдаа,
• “Нээлттэй Хөвсгөл-Нутгаа зорьё” сумдын танилцуулга,
• “Хөвсгөлийн цуурай” Хөвсгөл аймгийн зураач, урчуудын үзэсгэлэн,
• “Хөх сувдын орон” урлагийн тоглолт,
• “Хөвсгөл гоёл” үндэсний хувцасны загварын үзүүлбэр,
• “3X3” сагсан бөмбөгийн тэмцээн, номын үзэсгэлэн худалдаа зэрэг арга хэжээ зохион байгуулахаар төлөвлөжээ.

Өдөрлөгт Хөвсгөл аймгийн 21 сумын 200-аад иргэн, аж ахуйн нэгж 250 гаруй нэр төрлийн бүтээгдэхүүн, үйлчилгээгээр оролцож байна.

“Нээлттэй Хөвсгөл”-д ирснээр та Хөвсгөл аймгийн онцлогтой танилцаж, урлаг соёлын үзүүлбэр үзэж, Хөвсгөлийн брэнд бүтээгдэхүүн, хүнс, хоолыг амтлах, худалдан авах боломжтой.