​ Морин хуурын чуулга Версалийн хааны ордны театрт анх удаа тоглолоо

Монгол Улсын Ерөнхийлөгч У.Хүрэлсүх Бүгд Найрамдах Франц улсын Ерөнхийлөгч Эммануэл Макроны урилгаар төрийн айлчлал хийж байна. Айлчлалын хүрээнд Монгол Улсын Соёлын элч Морин хуурын чуулгын уран бүтээлчид Францын Версалийн хааны ордны Дуурийн театрт анх удаа тоглолоо. Үндэстнийхээ уламжлал, төрийн бэлгэдлийг агуулсан “Монголын сайхан орон” хүндэтгэлийн тоглолтыг Монгол Улсын Ерөнхийлөгч У.Хүрэлсүх, гэргий Л.Болорцэцэг болон Бүгд Найрамдах Франц улсын Европ, Гадаад хэргийн сайд Катерин Колонна зэрэг францын төр, засгийн тэргүүн, Парист төвтэй олон улсын байгууллагын төлөөлөл урилгаар үзэж сонирхсон байна. Морин хуурын чуулга Версалийн ордны Хааны дуурийн театрын тайзнаа өөрийн урын сангаасаа үндэсний, ардын болон сонгодог төрлийн 15 бүтээлийг толилуулсан нь үзэгч олны талархлыг хүлээв. Тус чуулга үүсгэн байгуулагдсанаас хойш 31 жилийн хугацаанд 30 гаруй оронд 650 гаруй тоглолт хийгээд байна.