БНАСАУ хиймэл дагуул хөөргөлөө

БНАСАУ-ын Сансрын агентлаг “Маллигёнг-1” хиймэл дагуулыг тойрог замд  амжилттай  оруулснаа мэдэгдсэн.  Хиймэл дагуул хөөргөсөн нь БНАСАУ-ын удирдагч Ким Жон Уны сүүлийн хоёр жилд хийсэн баллистик пуужингийн туршилтаас ялгаатай байв. Тэрбээр ОХУ-д айлчлахдаа “Восточный” сансрын буудалд Ерөнхийлөгч  Владимир Путинтэй  уулзаж сансрын технологийн талаар ярилцсан билээ.   Боловсронгуй болж буй тив алгасагч баллистик пуужингаа (ICBM) туршихдаа ашигладаг технологид тулгуурлажээ. Энэ нь Сөүл, Токио, Вашингтонд улам бүр түгшүүр төрүүлнэ. Тиймээс Япон, Өмнөд Солонгос, АНУ-ын тал нягталж  байгаа бөгөөд энэ явдлыг Солонгосын хойг дахь цэргийн хурцадмал байдлыг нэмэгдүүлж, олон улсын хориг арга хэмжээг үр дүнгүй болгох сөрөг талтай гэж үзсэн. Зарим шинжээчийн үзэж байгаагаар Пхеньян баллис­тик пуужин болон цөмийн зэвсгийн хөтөлбөрөө сэргээсэн нь НҮБ-ын хориг арга хэмжээнээс зайлсхийх чадвартайг харууллаа. Өмнөд Солонгосын Ерөн­хийлөгч Юн Сук Ёол “Хий­мэл дагуул  тойрог замд оруулах пуужинтай болсноор цэнэгт хошуу тээвэрлэх чадвартай пуужин бүтээж чадна” гэжээ.  Энэ удаагийн тур­шилт тогтворгүй болсон хоёр Солонгосын харилцааг сэвтээсэн. Сөүлийн эрх баригчид  2018 онд бай­гуулсан гэрээгээ нэн даруй зогсоож, хилийн ойролцоо хамгаалалтын бүс, нислэгийн хориотой бүс байгуулж, их буу, тэн­ги­сийн цэргийн сур­гуулилалт, тандалтын үйл ажиллагаа, түүнчлэн нээлт­тэй холбооны шугам ашиг­лахыг хориглосон байна.