Европын холбооны барууны орнуудад хэрэгжүүлэх хиймэл оюуны хамгийн иж бүрэн гэж хэлж болох хуулийн төслийг удаан хугацаанд хэлэлцсэний үр дүнд боловсрууллаа.
Энэхүү хуулийн төсөл нь хиймэл оюун ухааны нөөц бололцоог иж бүрэн ашиглахын сацуу иргэд, компаниудын үндсэн эрхийг хамгаалахад чиглэж байгааг Европын холбооноос мэдэгдээд байгаа юм. ЕХ-ны дотоод зах зээлийн асуудал хариуцсан комиссар Тьерри Бретон дэлхийд анхных нь болж байгаа хуулийн төслөө “Түүхэн” гэж нэрлэсэн юм. Тус хэлэлцүүлэг 30 гаруй цаг үргэлжилсэн бөгөөд Европын комисс, Европын парламент болон 27 гишүүн орны төлөөлөл санал нэгдсэн байна. Зохицуулалтаар “OPEN AI”-ийн “ChatGPT” , “Google”-ийн “BARD” зэрэг хиймэл оюуны хэрэглүүрт хяналт тавих юм. Тодруулбал, ChatGPT шиг хиймэл оюуны систем бүтээдэг компаниуд ил тод байх аж. Хиймэл оюунаар бүтээсэн контентын талаар мэдээлэх үүрэгтэй мөн хууль бус контент үйлдвэрлэхгүй байх талаар загварчлал боловсруулах ёстой гэж заасан байна.
Үүнээс гадна хэрэглэгчид гомдол гаргах эрх, зөрчлүүдийг шийдвэрлэх хэм хэмжээ, торгууль шийтгэлийн хэмжээг тодорхойлсон байна. Европын парламент энэхүү хуулийн төслөөрөө ирэх оны эхээр санал хураалт явуулахаар болжээ.
Эх сурвалж: Монголын үнэн сонин №047/24578/
°C
Сэтгэгдэл (0)
Сэтгэгдэл бичигдээгүй байна