Австрали улсын Засгийн газар ирэх хоёр жилийн хугацаанд цагаачдын тоог хоёр дахин бууруулахаар боллоо. Учир нь 2022-2023 оны хооронд буюу ганцхан жилийн дотор цагаачдын тоо 510 мянга давсан нь тус улсад урьд өмнө байгаагүй хамгийн өндөр үзүүлэлт болжээ. Энэ тоог 2026 он хүртэл 250 мянга болгон бууруулахаар төлөвлөж байгаа аж. “Ковид-19” цар тахлын үед Австрали улс эдийн засгаа илүү сайжруулан бизнес эрхлэгчдээ дэмжихийн тулд тус улсад суралцах гадаад оюутан, хөдөлмөрийн гэрээт ажилчдад хоёр жилийн хугацаанд орших хугацаа өгч байв.
Гэвч энэхүү бодлого нь түрээсийн зах зээлд дарамт учруулан улмаар тус улсад орон гэргүй хүмүүсийн тоо эрс нэмэгджээ. Харин одоо Австрали улсад ажиллаж, суралцахын тулд англи хэлний мэдлэгийн өндөр түвшин шаардлагатай байна. Хоёр дахь удаагийн виз авах хүсэлтийг илүү нягталж оршин суух хугацааг нь сунгах юм. Тус улсын Дотоод хэргийн сайд Клэр О’Нил “Бид шилжилт хөдөлгөөний тоог хэвийн болгох төлөвлөгөөтэй байгаа” хэмээн хэвлэл мэдээллийн бага хурлын үеэр хэллээ. Тэгвэл тус улсын ерөнхий сайд Энтони Албанес “Австралийн цагаачдын тоог тогтвортой түвшинд буцаан бууруулна” хэмээн зарлалаа.
Сиднейн “Морнинг Хералд” сонинд хийсэн судалгаагаар иргэдийн 62 хувь нь тус улсын цагаачлал хэт өндөр байгааг харуулж байна. Удаан хугацаанд хөдөлмөрийн зах зээлийн хомстлоо цагаачдаар нөхөж ирсэн Австралийн Засгийн газар бага ур чадвартай хүнд хөдөлмөр эрхэлдэг цагаачдыг цөөлөх юм байна. Харин өндөр ур чадвартай ажилчдыг нэвтрүүлэх ажлаа түргэсгэж, тусгай виз шинээр бий болгож, долоо хоногийн дотор боловсруулахаар болжээ.
Эх сурвалж: Монголын үнэн сонин №047/24578/
°C
Сэтгэгдэл (0)
Сэтгэгдэл бичигдээгүй байна