“Барби” есөн төрөлд нэр дэвшив

Кино урлагийн шилдгүүдийг шалгаруулдаг “Алтан бөмбөрцөг” наадамд өрсөлдөх нэр дэвшигчид тодорлоо. Тус наадамд хамгийн олон шагналд “Барби”, “Оппенхаймер” зино нэр дэвшсэн юм. Грета Гервигийн найруулсан “Барби” кино есөн төрөлд өрсөлдөх юм. Тодруулбал, “Шилдэг инээдмийн болон мюзикл кино” “Эмэгтэй шилдэг гол дүр” “Эмэгтэй туслах дүр” “Шилдэг найруулагч”, “Шилдэг зохиол”-ын төлөө өрсөлдөнө. Мөн Кристофер Ноланы “Оппенхаймер” намтарчилсан драм найман шагналын төлөө өрсөлдөнө. Тодруулбал, “Шилдэг драм кино”, “Шилдэг найруулагч”, “Шилдэг эрэгтэй гол дүр” , “Шилдэг туслах дүр”-ийн шагналд өрсөлдөнө. Олон улсын үзэгчдийг байлдан дагуулсан энэхүү киног Япон улсад гаргах эсэхийг тус улсын кино компаниуд хэлэлцэж байсан. Учир нь уг кинонд атомын бөмбөгийг зохион бүтээсэн хүний намтрыг өгүүлдэг. Хирошима, Нагасакид цөмийн бөмбөг хаясан гашуун түүхийг үл тоомсорлосон кино зах зээлд гаргасан хэмээх япончуудын шүүмжлэлд өртсөн юм. Тэгвэл Японы кино дистрибьютер компани болох “Битерс Энд” урт хугацаанд зөвшилцсөний дүнд ирэх оноос тус киног гаргахаар болсноо мэдэгджээ. “Алтан бөмбөрцөг” наадам ирэх сарын 7-нд болно.

Эх сурвалж: Монголын үнэн сонин №048/24579/