“Монгол Улс Евразийн соёлын солилцооны төв болох нь” үзэсгэлэнг дэлгэнэ

Монгол Улсын Соёлын яамнаас соёл, урлагийн салбарыг хөгжүүлэх, олон талт хамтын ажиллагааг гүнзгийрүүлэх, тэр дундаа Монголын соёлын өвийг дэлхий дахинаа сурталчлан таниулах чиглэлд олон улстай хамтран ажиллаж байгаа билээ. Энэ хүрээнд Монгол Улсын музейн хөгжилд анхаарах, гадаад улсын музейтэй хамтын ажиллагааг хөгжүүлэх, харилцан туршлага судлах, хамтарсан төсөл хөтөлбөр хэрэгжүүлэн ажиллаж байна. Эдгээрийн нэгэн тод жишээ нь Франц улсын Нант хотод дэлгэж буй “Чингис хаан: Монголчууд дэлхийг өөрчилсөн нь” үзэсгэлэн бөгөөд тус үзэсгэлэнг энэ онд эх орондоо болон АНУ-д дэлгэхээр төлөвлөж байгаа ажээ. Нант хотод дэлгэгдэж буй үзэсгэлэнд одоогийн байдлаар 200 мянга гаруй хүн зочилсон бөгөөд энэхүү үзэсгэлэнг үргэлжлүүлэн 2025 онд Швейцар улсад гаргахаар болсон байна. Энэ хүрээнд Соёлын яамныхан Ритбергийн музейн дэд захирал ноён Йоханнес Белцтэй уулзаж ярилцжээ.

Музейн хөтөч, дэглээч, уран бүтээлчдийг чадавхжуулах, Монгол, Швейцарын хамтарсан төсөл хөтөлбөр хэрэгжүүлэх боломжтойг уулзалтын үеэр дурдсан байна. Мөн түүхэн олдворуудаас гадна урлаг, монгол үндэсний хувцас, загварын салбарт хамтарч үзэсгэлэн гаргах асуудал болон цаашид урт хугацаанд хамтран ажиллах талаар ярилцсаныг Соёлын яамнаас мэдээллээ.

Эх сурвалж: Монголын үнэн сонин №001/24580/