“Troupe Zola- Есөн өрлөг” хамтлагийнхан гран-при шагнал хүртлээ

Олон улсын циркчдийн шинэ оны анхны тэмцээн Унгар улсын Будапешт хотод боллоо. 15 дахь удаагаа зохион байгуулсан тус тэмцээнд Монгол Улсыг төлөөлж “Troupe Zola- Есөн өрлөг” хамтлагийнхан амжилттай оролцож гран-при шагнал хүртжээ. Тэдэнтэй хамт “Angels” уран нугаралтын төвийн уран нугараач охид авьяас чадвараа сорьж хүрэл медаль хүртсэн байна. Будапештийн циркийн олон улсын тэмцээний 30 жилийн ой энэ онд тохиож буйгаараа онцлогтой. Энэ удаагийн тэмцээнд 20 гаруй орны 50 уран бүтээл, 100 гаруй уран бүтээлч улаан, ногоон, цагаан хэсэгт хуваагдаж өрсөлдсөн байна. Дэлхийн циркийн урлагийн өнгийг тодорхойлогч Орос, Хятад, Франц, Унгар, Канад улсын уран бүтээлчид энэхүү тэмцээнд онцгой ач холбогдол өгч  шилдгүүдээ ирүүлснийг уран бүтээлчид онцолж байв.

Циркийн хамгийн нэр хүндтэй наадмуудын нэг болох Будапештийн олон улсын циркийн наадам 1996 оноос хойш хоёр жил тутамд зохион байгуулагдаж байгаа юм. Энэхүү наадамд оролцсон “Troupe Zola- Есөн өрлөг” хамтлагийн хувьд 1986 онд олон нийтэд хүргэсэн Болгарын “Kehayovi” хамтлагийн 37 жил эвдэгдээгүй Геннисийн амжилтыг эвдсэн. Тодруулбал, тэд долоон давхарт дан эргэлт амжилтыг, долоон давхарт хоёр эргэлт болгож ахиулж циркийн урлагт шинэ түүхийг эхлүүлжээ. 

Эх сурвалж: Монголын үнэн сонин №002/24581/