Багш шавийн хамтрал “Эргэх холбоо”

Монгол Улсын Соёлын гавьяат зүтгэлтэн, зураач Ц.Энхжаргал, Соёлын тэргүүний ажилтан, Монголын урчуудын эвлэлийн гишүүн зураач У.Батцоож нарын “Эргэх холбоо” үзэсгэлэнг Г.Занабазарын нэрэмжит Дүрслэх урлагийн музейд дэлгэнэ. Уран бүтээлч Ц.Энхжаргал шавь У.Батцоожтой хамтран гаргаж буй уг үзэсгэлэнгээ багш шавийн нандин холбоо, эрдэм ухааны хэлхээ хэмээн тодотгон “Эргэх холбоо” хэмээн нэрийджээ. Тус үзэсгэлэн хоёр зураачийн 40 гаруй бүтээлээс бүрдэх юм. Зураач Ц.Энхжаргалын хурц өнгө, уянга эгшгээр дүүрэн уран зургууд хүний сэтгэлийг татах увдистай. Тус үзэсгэлэнд “Чонон сар”, “Нам гүм”, “Дүлий шөнө”, “Уртын дуу”, “Улаан ба хар” зэрэг том хэмжээний бүтээл мөн “Цагаан шөнө”, “Унтаж байгаа хөгжим”, “Сарны үнсэлт”, “Тэртээд үлдсэн бага нас”, “Нуугдсан хавар” зэрэг уран зургийг дэлгэхээр бэлдсэн байна. Харин зураач У.Батцоожийн хувьд Дархан хотод дунд сургууль төгсөж, Дүрслэх урлагийн сургуульд элсэн суралцжээ. Тэрбээр өмнө нь “Ойллого”, “Б урлангийн 209 тоот” зэрэг гурван бие даасан үзэсгэлэн гаргасан байна. Бүтээлүүд нь үлгэр, домог, зөн бэлгэ, зүүд зэрэглээний хөг эгшгээр дүүрэн байдаг бөгөөд энэ удаа “Туульс”, “Тумбааш”, “Жангар” “Зөнгийн мэлмий” зэрэг том хэмжээний бүтээлээ толилуулахаар болжээ. “Эргэх холбоо” үзэсгэлэнг энэ сарын 27-ныг хүртэл үзэгчдийн хүртээл болгох аж.

Эх сурвалж: Монголын үнэн сонин №006/24585/