Хутагтуудад зориулан бүтээлгэсэн маркийг танилцуулав

Завхан аймгийн ЗДТГ-ын захиалгаар “Монгол Улсын Ерөнхий сайд Жалханз хутагт Ц.Дамдинбазар”, “Улиастайн сайд Дилов хутагт Б.Жамсранжав” сэдэвт марк бүтээснийг олон нийтэд танилцууллаа. Эдгээр маркийг энэ сарын 6-наас гүйлгээнд гаргаж олон нийтэд хүргэжээ.  Маркийн зураачаар Монгол Улсын Урлагийн гавьяат зүтгэлтэн, доктор, профессор, бурханч лам Г.Пүрэвбат агсан ажилласан ба Монголын уламжлалт шүтээн урлагт багш дээдсийг хүндэтгэн дээдэлж, тогтсон бэлгэдлээр шүтээн бүтээдэг уламжлалаар хувь хэмжээний онолоор бүтээжээ. Түшлэгт ширээн дээр Жалханз хутагт Ц.Дамдинбазар төрийн сүлд, тамга, долоон эрдэнэ, дөрвөн хүчтэний хамт, Дилов хутагт Б.Жамсранжав номын хувцастай, хонх, очир барин заларч буй нь шашин номд төгс боловсорсон номын багш болохыг бататгасан зохиомжоор дүрсэлсэн байна. Жалханз хутагт Ц.Дамдинбазар нь 1912 онд Монголын баруун хязгаарыг илбэн тохинуулах сайд, 1921, 1922 онд Монгол Улсын Ерөнхий сайдаар хоёр удаа томилогдон ажилласан, Дилов хутагт Б.Жамсранжав нь 1921-1923 онд Улиастай сайдаар томилогдон ажиллаж байсан бурхан шашны гүн ухаанд нэвтэрсэн хутагтууд байсан төдийгүй Монголын нийгэм, төрийн үйл хэрэгт тэргүүлэх үүрэгтэйгээр оролцож байсан зүтгэлтнүүд юм.

Эх сурвалж: Монголын үнэн сонин №023/24602/