Залуучууд, эмэгтэйчүүд чуулж, ахмадууд асуудлаа хэлэлцлээ

Бага хурлын V хуралдаанаар МАН-ын Удирдах зөвлөлийн бүрэлдэхүүнд өөрчлөлт оруулж, Нарийн бичгийн дарга нарыг сонгосон. Үүний дагуу намын дэргэдэх байгууллагуудын удирдлагыг шинэчлэх ажил ид  өрнөж байна.

УИХ-ын ээлжит сонгуулийн дүнд Монгол Улс анх удаа 126 гишүүний бүрэлдэхүүнтэй  парламенттай болж, үйл ажиллагаагаа эхлүүлээд байна.  2024 оны ээлжит сонгуульд МАН олонхын санал авч, ялалт байгуулсан ч улс орны цаашдын хөгжил, Засгийн газрын тогтвортой байдлыг хангах үүднээс АН, ХҮН намыг засагт урьж, хамтарсан Засгийн газрыг байгуулсан. Улмаар “Хурдтай хөгжлийн төлөөх зориг” нэртэй гэрээг хэрэгжүүлэн ажиллахаар болоод буй. Сонгуулийн дүнд бүрдсэн  төр, засгийн үйл ажиллагаа ийнхүү жигдрээд  байгаа бол МАН-ын дотоод дахь бүтэц, зохион байгуулалтын ажил ид үргэлжилж байна.  Тодруулбал, МАН-ын  Бага хурлын V хуралдааныг өнгөрсөн долдугаар сард зохион байгуулсан. Энэ үеэр МАН-ын дарга Л.Оюун-Эрдэнэ ковид цар тахлын хүнд цаг хугацааны дараа дэлхийн олон оронд болж буй улс төрийн сонгуульд эрх баригч хүчин ялсан анхны тохиолдол нь МАН-ын ээлжит сонгуулийн ялалт болж байгааг онцолсон юм. Улмаар  Бага хурлын V хуралдаанаар МАН-ын Ерөнхий нарийн бичгийн даргаар сүүлийн найман жил тасралтгүй ажиллаж, шат шатны гурван удаагийн сонгуульд намын сонгуулийн төв штабыг удирдан ажиллаж байсан Д.Амарбаясгалан УИХ-ын даргаар сонгогдсон учраас шинэ Ерөнхий нарийн бичгийн даргыг сонгосон юм. Энэ албан тушаалд өмнө нь МАН-ын даргын зүгээс Ерөнхийлөгчийн Тамгын газрын даргаар ажиллаж байсан Я.Содбаатарыг нэр дэвшүүлж, Бага  хурлын  гишүүдийн олонхын саналаар баталсан билээ.  Мөн Бага хурлын V хуралдаанаар МАН-ын Удирдах зөвлөлийн бүрэлдэхүүнд өөрчлөлт оруулж, Нарийн бичгийн дарга нарыг сонгосон.  Тодруулбал, өмнө нь намын Нарийн бичгийн даргаар ажиллаж байсан А.Ариунзаяа, О.Батнайрамдал нар УИХ-ын гишүүнээр сонгогдсон тул тэдний оронд Д.Сумъяабазар, Х.Алтай нарыг сонгосон бол  УИХ дахь МАН-ын бүлгийн даргаар сонгогдсон гишүүн Л.Мөнхбаатар, Нийслэлийн МАН-ын хорооны дарга, Нийслэлийн Засаг дарга бөгөөд Улаанбаатар хотын захирагч Х.Нямбаатар нарыг Удирдах зөвлөлийн гишүүнээр сонгосон юм.  Ийнхүү МАН-ын удирдлагын бүрэлдэхүүнд өөрчлөлт оруулсны  дагуу намын дэргэдэх байгууллагын удирдлагыг шинэчлэх ажил ид  өрнөж байна. Тодруулбал, МАН-ын дэргэхэд СДМЗХ-ны ээлжит VII Их хурлыг зохион байгуулж,  Ерөнхийлөгчөөр МАН-ын Намын байгуулалтын газрын дарга Б.Пүрэвдагвыг сонгосон бол МАН-ын дэргэдэх Ахмадын холбоо ч мөн ээлжит VIII  Их хурлаа зохион байгууллаа.  Ингэснээр  Социал демократ Ахмадын холбооны  тэргүүнээр ажиллаж байсан Н.Энхболд ажлаа хүлээлгэн өгч,  тус холбооны Ерөнхий нарийн бичгийн даргаар ажиллаж байсан Б.Гомбо шинэ тэргүүнээр сонгогдон, ажлаа хүлээж авлаа. Түүнчлэн СДМЭХ, СДМОХ-ны ээлжит хурлыг тун удахгүй зохион байгуулж,  дотоод бүтэц, бүрэлдэхүүнээ шинэчлэхээр бэлтгэж байна.  Улмаар МАН удирдах ажилтны улсын зөвлөгөөнийг мөн зохион байгуулахаар зэхэж байгаа юм. Энэ үеэр  МАН-аас орон нутгийн сонгуульд нэр дэвшигчид цугларах бөгөөд тэдэнд намын удирдлагуудын зүгээс 2024 оны УИХ-ын сонгуулийн үр дүн, хамтарсан Засгийн газар байгуулагдах үндсэн шалтгаан, улс орны өнөөдрийн нөхцөл байдал, эдийн засаг, цаашид Засгийн газар 14 чиглэлд томоохон төслүүдийг хэрэгжүүлэн ажиллах тухай болон орон нутгийн сонгуульд бэлтгэл хангаж, өндөр үр дүнтэйгээр оролцох талаарх мэдээ мэдээллийг хуваалцана.  Ийнхүү МАН-ын дэргэдэх байгууллагуудын үйл ажиллагаа эрчимжиж байна. 

 М.Өнөржаргал

Эх сурвалж: Монголын үнэн сонин №035/24614/