Монгол, БНХАУ-ын улс хооронд дипломат харилцаа тогтоосны 75 жилийн ойн энэ онд тохиож байна. Энэ хүрээнд МАН-ын Ерөнхий нарийн бичгийн дарга Я.Содбаатар энэ сарын 2-нд Хятадын Коммунист намын төв хорооны суртал ухуулгын яамны дэд сайд, БНХАУ-ын Төрийн зөвлөлийн мэдээллийн албаны дарга Мо Гаойи тэргүүтэй төлөөлөгчдийг хүлээн авч уулзжээ. Уулзалтын эхэнд МАН-ын Ерөнхий нарийн бичгийн дарга Я.Содбаатар түүхт ойн хүрээнд БНХАУ-ын дарга Ши Жиньпиний “Төр улсыг засахуй”, “Ядуурлаас ангижруулахуй” номыг Монголын уншигчдын хүртээл болгож байгаад талархаж буйгаа илэрхийлсэн байна. Мөн уулзалтын үеэр хоёр улсын найрамдалт харилцаа, улс төр, эдийн засаг, шинжлэх ухаан болон хоёр нам хоорондын хамтын ажиллагаа зэрэг өргөн сэдвээр санал солилцжээ. Монгол Улс цаашид цахим, ногоон, хүний нөөцийн гэсэн гурван томоохон шилжилт хийхээр ажиллаж буй бөгөөд БНХАУ-ын хувьд ч эдгээр чиглэлүүдэд хөгжлийн бодлогоо тодорхойлон ажиллаж буй. Цаашид хоёр улсын хамтын ажиллагааг бүх шатанд өргөжүүлэн хөгжүүлэхэд хоёр нам хоорондын хамтын ажиллагаа чухал гэдэгт талууд санал нэгдэж, оюутан, залуучуудын харилцан солилцооны хөтөлбөрийг үргэлжлүүлэх, эмэгтэйчүүдийн оролцоог нэмэгдүүлэх зэргээр бүх түвшинд идэвхтэй хамтарч ажиллахаа онцолжээ.
Н.Энх
Эх сурвалж: Монголын үнэн сонин №046/24625/
°C
Сэтгэгдэл (0)
Сэтгэгдэл бичигдээгүй байна