МАН “Иргэдээ сонсъё” уулзалтаа эхлүүллээ

МАН Монгол Ардын намын Удирдах зөвлөлийн ажлын албаны удирдлагууд болон Монгол Ардын намаас сонгогдсон УИХ-ын гишүүд иргэд олон нийт, намын гишүүдийн санал хүсэлтийг хүлээн авч уулзах  “Иргэдээ сонсъё” уулзалтаа энэ сарын 5-наас   эхлүүллээ.

Энэ хүрээнд УИХ-ын гишүүн М.Энхцэцэг, Монгол Ардын намын Орон нутаг, намын хөгжлийн хэлтсийн дарга Т.Галсан нар иргэд, намын гишүүдийн төлөөллийг Тусгаар тогтнолын ордны нэгдүгээр давхрын уулзалтын өрөөнд хүлээн авч уулзсан байна.

Иргэдийн зүгээс нийслэлийн утаа, тоосжилт, автозамын түгжрэлийн асуудлыг шийдвэрлэхэд онцгой анхаарах, эрүүл мэндийн үйлчилгээний чанар, хүртээмжийг сайжруулах, УИХ-ын гишүүдийн үүрэг, хариуцлагыг чангатгахад намын зүгээс анхаарахыг хүсэв. Мөн эмэгтэйчүүд, залуучууд, ахмадууд руу чиглэсэн төслүүдийг олноор хэрэгжүүлэх, тэднийг дэмжих, намын байгууллагыг залуучуудад нээлттэй болгох, тэтгэврийн шинэчлэлийг үр дүнтэй хийх зэрэг саналуудыг  ирүүлжээ. Намын үйл ажиллагаанд гишүүд, иргэдийн санал, хүсэлт, шүүмж чухал нөлөөтэй гэдгийг уулзалтад оролцсон албан тушаалтнууд үзэж байв. Цаашид Монгол Ардын намын зүгээс иргэдийн өгсөн эдгээр санал, шүүмжийг холбогдох нэгжид хүргүүлэх, шийдвэрлэх, бодлого шийдвэртээ тусган ажиллахад онцгой анхаарна гэдгээ хэлж байлаа.

 Эх сурвалж: Монголын үнэн сонин №046/24625/