Оросын зураач Василий Кандинскийн нэгэн бүтээлийг Германы “Грисебах” дуудлага худалдааны ордон 310 мянган еврогоор худалдсан билээ. Гэвч Польшийн эрх баригчид энэхүү бүтээлийг 1984 онд Варшавын Үндэсний музейгээс алдагдсан зураг гэж мэдэгдсэн. “Грисебах” ордны зохион байгуулагчид Польшийн Соёлын яамны нэхэмжлэл, бусад баримтыг хянасан ч дуудлага худалдааг үргэлжлүүлжээ.
Берлин дэх Польшийн консул Марчин Крол “Хулгайлагдсан урлагийн бүтээлийн тухай Интерполын мэдээллийн санд бүртгэлтэй байсан. Германы дуудлага худалдааны ордныхон эл бүтээлийг Польшийн музейгээс алдсаныг мэдсэн ч ёс зүйгүй хандаж олон улсын стандартыг үл тоон худалдсан. Бид Кандинскийн зургийг эргүүлэн авахын тулд хууль ёсны арга хэмжээ авна” гэжээ.
Польш улс дэлхийн хоёрдугаар дайны үеэр нацистуудын олзлон булаасан урлаг, түүх соёлын дурсгалуудыг эргүүлэн өгөх, нөхөн олговор төлөхийг Германы талаас шаарддаг. Польшийн Засгийн газар Берлин рүү дипломат ноот илгээж, 1.4 тэрбум ам.долларын нөхөн төлбөр олгохыг хүссэн юм. ЗСБНХУ болон Зүүн Германы хооронд 1953 онд байгуулсан гэрээний дагуу Польшийн тал нэхэмжлэлээсээ татгалзсан учир Германы засгийн газар дайны нөхөн төлбөр төлөх шаардлагагүй гэж мэдэгджээ. Харин Польш улс тухайн үед ЗХУ-аас хараат бус байсан тул гэрээ хүчин төгөлдөр бус гэж үздэг.
Х.ЗАЯА
°C