"Авдар"

Орчуулсан: Э.Солонго
Чүндж паблишинг 

Авдарт ороод тагийг нь хаасны дараа нарийн хүзүүтийн амьсгал давчдаж эхэллээ. Би нарийхан хүзүүтэй учраас авдар дотор давчдаж байна гэж нарийн хүзүүт амьсгаадан ярина. Авдрын таг хаалттай учир агаар орохгүй. Амьсгаа минь давчдаж байвч авдрын тагийг нээхгүй ээ. Би аажим аажмаар үхнэ. Амьдрал, үхлийн тэмцлийг би харж байна. Тэмцэл ижил боломжтой гэдэг нь худал. Үхэл дийлж амьдрал мөхөх жамтай ч хоосон найдвараа гээлгүй дайсантайгаа эцсийн мөчөө хүртэл тулалдсаар байдаг. Одоо болж буй энэ тэмцэлд амьдрал ялах арга замаа мэднэ ээ: үүний тулд миний гараар авдрын тагийг нээлгэхээр намайг албадах хэрэгтэй. Хэн нь хэн бэ гэдгийг харцгаая. Нафталин (өвөрмөц үнэртэй хатуу талст бодис) ой гутмаар үнэртэж байна. Хэрэвзээ амьдрал дийлэх аваас энэ авдарт байгаа эд зүйл рүү мохоор тамхи цацна аа... Эхэлж байна гээч: би цаашид амьсгалж чадашгүй нь... Үхэх нь тодорхой! Ямар ч аврал алга! Миний толгойд ямар ч агуу санаа алга. Амьсгаа давчдаж байна!...
Өө! Юу гээч нь вэ? Сая нэг зүйл болоод өнгөрсөн ч яг юу гэдгийг нь ойлгож чадсангүй. Би нэг юм харсан үгүй бол сонссон...
Хүүе! Ахин нэг зүйл тохиов уу? Бурхан минь! Амьсгалж чадахгүй байна. Би үхэж байх шиг байна...
Энэ бас юу гээч вэ? Би яагаад дуулаад байгаа юм бол? Хүзүү өвдөөд ч байх шиг... Гэхдээ авдар хааччихав? Яагаад өрөөн дэх бүх зүйл харагдаад байгаа юм бол? Би шалан дээр хэвтэж байна! Авдар хааччихав аа?
Нарийн хүзүүт шалан дээрээс босоод эргэн тойрноо ажиглав. Авдар хаана ч байсангүй. Сандал болон орон дээр авдарнаас гаргасан эд зүйлс хэвтэх ч авдар л алга.
Нарийн хүзүүт хэлж байна:
- Тэгэхээр, амьдрал надад мэдэгдэлгүйгээр үхлийг ялсан гэсэн үг.
Зохиолч 
Даниил Хармс

Эх сурвалж: Монголын үнэн сонин №033/24612/