Монголын хөнгөн атлетик, холын зайн гүйлтэд цахиур хагалан гарч ирж, олимпын наадамд эх орноо төлөөлөн хэдэнтээ оролцсон олон улсын хэмжээний мастер Б.Мөнхзаяагийн амжилтыг энэ дугаартаа онцолж байна.
Сөүл хотод зохион байгуулсан марафонд гаргасан амжилтаараа Парисын зуны олимпын наадамд оролцох эрхтэй болсон тэрбээр БНХАУ-ын ӨМӨЗО-ы Хөх хотын марафонд амжилттай уралдаад иржээ. Манай улсаас дөрвөн тамирчин өрсөлдөхөд Үндэсний шигшээ багийн тамирчин Б.Мөнхзаяа хагас марафон буюу 21 км-ийн зайг 1:16.38 цагийн амжилтаар туулж, алтан медаль хүртсэн байна. Харин бүтэн марафон буюу 42 км-ийн зайд Г.Ганцэцэг 12 дугаар байрт шалгарч Бостон марафонд уралдах эрхээ авлаа.
“Улаанбаатар марафон”-ы зургаан удаагийн аварга, улсын аварга шалгаруулах тэмцээний 5000, 10000, хагас марафоны дээд амжилтыг эзэмшигч Б.Мөнхзаяа нь “Рио-2016”, “Токио-2020”, Парис-2024” зуны олимпын наадамд тоосоо өргөсөн Монголын шилдэг марафончдын нэг юм. Түүний гэр бүлийн хүн ч холын зайн гүйлтэд данстай тамирчин. Олон улсын хэмжээний мастер Б.Доржпалам хөнгөн атлетикийн спортоор 2009-2016 оны хооронд хичээллэж байгаад дасгалжуулагч болжээ. Хэт холын марафон гүйлт буюу 100км-ийн зайд Монгол Улсын дээд амжилтыг эзэмшдэг.
Тэд 2011 онд гэр бүл болсон бөгөөд дасгалжуулагчаар ажиллах шийдвэрийг өөрөө гаргажээ. Одоо тэд хамтдаа амжилтын төлөө зүтгэж байна. Б.Мөнхзаяагийн Парисын зуны олимпын наадмын бэлтгэлийг түүний нөхөр, дасгалжуулагч Б.Доржпалам хариуцан ажиллаж өдгөө олон улсын тэмцээн уралдаанд оролцож явна.
Б.Сийлэн
Эх сурвалж: Монголын үнэн сонин №036/24615/
°C
Сэтгэгдэл (0)
Сэтгэгдэл бичигдээгүй байна