Дэлхийн бөхийн нэгдсэн холбооны гүйцэтгэх зөвлөлд гишүүнтэй боллоо

Албани улсын Тирана хотод Дэлхийн бөхийн нэгдсэн холбооны ээлжит конгресс амжилттай болж өндөрлөлөө. Уг хуралд Монголын чөлөөт бөхийн холбооны ерөнхийлөгч Я.Содбаатар, ерөнхий нарийн бичгийн дарга Б.Мянганбаяр, Удирдах зөвлөлийн гишүүд болох С.Энхболд, П.Буяндэлгэр нар оролцжээ. Энэ үеэр Монголын чөлөөт бөхийн холбооны Удирдах зөвлөлийн гишүүн, Азийн бөхийн холбооны ерөнхий нарийн бичгийн дарга П.Буяндэлгэр Дэлхийн бөхийн нэгдсэн холбооны гүйцэтгэх зөвлөлд нийт 16 нэр дэвшигчдээс шинээр сонгогдсон долоон гишүүний нэгээр шалгарав. Монгол Улс анх удаа Дэлхийн бөхийн нэгдсэн холбооны гүйцэтгэх зөвлөлд гишүүнтэй болсон нь цаашид манай улсын чөлөөт бөхийн ирээдүйн хөгжилд нэгэн шинэ хаалга нээгдэж байгаа явдал юм. Энэхүү хуралд 124 орны төлөөлөгч оролцож Дэлхийн бөхийн нэгдсэн холбооны үйл ажиллагааны тайлан, дүгнэлт болон дүрмийн шинэчилсэн найруулгыг болон бусад асуудлын талаар хэлэлцэн баталсан байна. Ташрамд, Монголын чөлөөт бөхийн холбооны ээлжит их хурал болж холбооны ерөнхийлөгчөөр МАН-ын ерөнхий нарийн бичгийн дарга Я.Содбаатар улиран сонгогдсон юм. Тэрбээр хурлын үеэр өнгөрсөн жилүүдийн санхүүгийн болон үйл ажиллагааны тайланг нийт ирсэн төлөөлөгчдөд тайлагнаж мөн төлөөлөгчдийн санал хүсэлтийг нээлттэй сонсжээ.   

Эх сурвалж: Монголын үнэн сонин №041/24620/