Жүдо бөхийн чансаа тогтоох барилдаан боллоо

Монголын жүдо бөхийн холбооноос Монгол Улсын Гавьяат дасгалжуулагч Ч.Машбатын нэрэмжит жүдо бөхийн дотоодын чансаа тогтоох “Sensei cup-2024” тэмцээнийг Спортын төв ордонд зохион байгууллаа. Дэлхийн жүдо бөхийн өдрийн хүрээнд зохион байгуулсан энэ жилийн тэмцээнд 46 багийн нийт 220 тамирчин өрсөлдлөө. Жин тус бүрд шалгарсан зургаан тамирчин ирэх сард болох “Топ-6” тэмцээнд оролцох эрх авч буйгаараа онцлогтой. Энэ жилийн тэмцээний 48 кг-ын жинд “Рио-2016” олимпын наадмын хүрэл медальт Г.Отгонцэцэг, дэлхийн аварга шалгаруулах тэмцээний хошой хүрэл медальт, Гавьяат тамирчин Ё.Басхүү, Л.Энхрийлэн болон өсвөрийн дэлхийн аварга шалгаруулах тэмцээний мөнгөн медальт Т.Отгонжаргал нарын шилдэг тамирчид дэвжээнд гарлаа. Түүнчлэн хэдхэн хоногийн өмнө цэргийн дэлхийн аварга болж тэнд Г.Наранцэцэг, Л.Сосорбарам нар энд барилдсан нь барилдааныг илүү сонирхолтой болгов. Тэмцээний 48 кг-ын жинд барилдсан Г.Отгонцэцэгийн хувьд “Токио-2020” олимпын наадмаас хойш гурван жилийн дараа дэвжээнд гарч байгаа нь энэ юм. Тэрбээр зодог тайлснаас хойш клуб байгуулан ирээдүйн жүдочдыг бэлдэж байна. “Sensei cup” тэмцээнийг 2020 онд анх зохион байгуулсан бөгөөд “Парис-2024” олимпын наадмын дараах томоохон сорил болохыг зохион байгуулагчид онцоллоо. Тэмцээн эхнээсээ олныг огшоосон олон барилдаантай байв. Заримаас нь дурдахад, эмэгтэйчүүдийн 48 кг-ын жингийн аваргын алтан медалийн төлөөх барилдаан Г.Отгонцэцэг, Г.Наранцэцэг нарын хооронд болсон бөгөөд нэмэлт цагт ялагч тодорлоо. Энэ жингийн аваргаар олон улсын хэмжээний мастер Г.Наранцэцэг тодорч мөнгөн медалийн тавцанд Г.Отгонцэцэг гарлаа. Харин гуравдугаар байрт Ж.Анударь, Т.Отгонжаргал нар оров. Эрэгтэйчүүдийн 66 кг-ын жингийн барилдаанд Гавьяат тамирчин Ё.Басхүү аваргалж, Ө.Бямбасүрэн мөнгөн медалийн эзэн болсон юм. Удаах байрыг Л.Сумъяа, Т.Төрболд нар эзэллээ.

Эх сурвалж: Монголын үнэн сонин №041/24620/